_ലോക മാനസികാരോഗ്യ ദിനം_ *പെരുമഴ ഉത്സവമാക്കി മാനവീയത്തിൽ മാനസികാരോഗ്യത്തിനായി ‘മനസ്സ്’ യുവസംഗമം*

പെരുമഴയിൽ പാട്ടും നൃത്തവും ചിത്രരചനയും ഫ്ലാഷ് മോബും കളരിപ്പയറ്റും എല്ലാമായി പാതിരാവോളം ഒരു യുവസംഗമം. ലോക മാനസികാരോഗ്യദിനത്തിൽ മാനവീയം വീഥിയിൽ ‘മനസ്’ എന്ന പേരിൽ മാനസികാരോഗ്യത്തിനായി സംഘടിപ്പിച്ച ഒത്തുചേരലാണ് പെരുമഴയിലും പാതിരാവോളം ആവേശമായത്. കേരള ശാസ്ത്രസാഹിത്യ പരിഷത്ത് തിരുവനന്തപുരം ജില്ലാ യുവസമിതിയുടെ നേതൃത്വത്തിൽ വിവിധ കലാലയങ്ങളുടെ പങ്കാളിത്തത്തോടെയും വെള്ളനാട് സൈക്കോ പാർക്കിൻ്റെ സഹകരണത്തോടെയും ആയിരുന്നു പരിപാടി.

Lived experiences heard: real voices, real change’ (കേട്ടറിയുന്ന ജീവിതാനുഭവങ്ങൾ: യഥാർത്ഥ ശബ്ദങ്ങൾ, യഥാർത്ഥ മാറ്റങ്ങൾ) എന്നതായിരുന്നു ഒത്തുചേരലിൻ്റെ സന്ദേശം. മാതൃകാപരമായ മാനസികാരോഗ്യ കൂട്ടായ്മ വികസിപ്പിക്കുകയാണു പരിപാടിയുടെ ലക്ഷ്യം. വൈകിട്ട് 5 30 തുടങ്ങിയ പരിപാടികൾ രാത്രി 10 മണിവരെ തുടർന്നു. യുവാക്കളുടെ സജീവപങ്കാളിത്തം മാനവീയത്തെ മേളപ്പറമ്പാക്കി.

സരസ്വതി കോളേജിലെ വിദ്യാർത്ഥികൾ അവതരിപ്പിച്ച ഫ്ലാഷ് മൊബ് ആഘോഷങ്ങൾക്ക് തുടക്കം കുറിച്ചു. കാര്യവട്ടം ക്യാമ്പസ്സിൽനിന്നുള്ള സൈക്കോളജി വിധയാർത്ഥിനി മാനസികാരോഗ്യസന്ദേശം കവിതയായി സദസ്യരിലേക്ക് എത്തിച്ചു. യൂണിവേഴ്സിറ്റി കോളേജിൽനിന്നും ക്രൈസ്റ്റ് കോളേജിൽ നിന്നുമുള്ള കുട്ടികളുടെ ഗിത്താർ ഷോ മഴയിൽ ചൂടു പകർന്നു. വിമൻസ് കോളേജിലെ വിദ്യാർത്ഥിനികളുടെ യോഗ ഡാൻസ്, ക്രൈസ്റ് കോളേജിൽ നിന്നുള്ള മോണോലോഗ്, മ്യൂസിക് ബാൻഡ്, ഡാൻസ് എന്നിവ സംഗമത്തെ ആഘോഷമാക്കി. സരസ്വതി കോളേജ് വിദ്യാർത്ഥികളുടെ ജാമിങ് സെഷൻ പുതുമയായി. ധീര കളരിപ്പായറ്റ് അക്കാദമിയിലെ കുട്ടികൾ അവതരിപ്പിച്ച കളരി ആയിരുന്നു കലാകായിപരിപാടികളിലെ സമാപനയനം. യുവാക്കളുടെ സോളോ പ്രകടനങ്ങളും ഉണ്ടായിരുന്നു. കോളേജുകൾ തയ്യാറാക്കിയ മാനസികാരോഗ്യസന്ദേശം അടങ്ങുന്ന പ്രദർശനം പരിപാടിക്കു നിറപ്പകിട്ടേകി.

കേരള ശാസ്ത്രസാഹിത്യ പരിഷത്ത് മുൻ പ്രസിഡൻ്റും പ്രമുഖ എഴുത്തുകാരനുമായ കെ. കെ. കൃഷ്ണകുമാർ പരിപാടി ഉദ്ഘാടനം ചെയ്തു. കരുണസായി കൗൺസിലിംഗ് കൺസൾട്ടന്റ് ഡോ. മധുജൻ മാനസികാരോഗ്യവുമായി ബന്ധപ്പെട്ട പൊതുധാരണകളെക്കുറിച്ചുള്ള ചർച്ചകൾക്കു നേതൃത്വം നൽകി. കരുണസായി സൈക്കോപാർക്ക് ഫെബ്രുവരി 12, 13, 14 തീയതികളിൽ നടത്തുന്ന ‘സൈഫെസ്റ്റ് 2027’ (Psyfest 2027)-ന്റെ ലോഗോപ്രകാശനവും ചടങ്ങിൽ നടന്നു.

മാനസികാരോഗ്യചർച്ചകളിൽ കേവലസിദ്ധാന്തങ്ങൾക്കും വിദഗ്ധാഭിപ്രായങ്ങൾക്കും അപ്പുറം, പ്രതിസന്ധികളിലൂടെ നേരിട്ടു കടന്നുപോയവരുടെയും പാർശ്വവൽക്കരിക്കപ്പെട്ടവരുടെയും അനുഭവിച്ചറിഞ്ഞ ശബ്ദങ്ങൾക്ക് പ്രാധാന്യം നൽകേണ്ടതിന്റെ ആവശ്യകതയാണ് കൂട്ടായ്മ മുന്നോട്ടുവെച്ചത്. ഇത്തരം അനുഭവങ്ങൾ സമൂഹം ഗൗരവത്തോടെ കേൾക്കുന്നത് തെറ്റിദ്ധാരണകൾ അകറ്റാനും സമൂഹത്തിൽ അനുകമ്പയും സഹാനുഭൂതിയും വളർത്താനും ഉപകരിക്കും. വ്യക്തികളുടെ അനുഭവങ്ങളിൽനിന്നു രൂപപ്പെടുന്ന മാറ്റങ്ങൾക്കാണ് കൂടുതൽ നിലനിൽപ്പുള്ളതെന്നും നയരൂപീകരണങ്ങളിൽ കൂടുതൽ നീതിപൂർവ്വമായ സമീപനങ്ങൾ കൊണ്ടുവരാൻ ഇത്തരം സംവാദങ്ങൾക്ക് സാധിക്കുമെന്നും സംഗമം വിലയിരുത്തി.

വിദ്യാർത്ഥികൾ, മാനസികാരോഗ്യ പ്രവർത്തകർ, അധ്യാപകർ, യുവജനങ്ങൾ എന്നിവരുടെ സജീവസാന്നിധ്യം കൊണ്ട് പരിപാടി ശ്രദ്ധേയമായി. വരാനിരിക്കുന്ന വിവിധ മാനസികാരോഗ്യ ബോധവൽക്കരണ കാമ്പെയ്‌നുകളുടെ ഔദ്യോഗികസമാരംഭം കൂടിയായി കൂട്ടായ്മ മാറി.