എല്ലാ ദിവസവും പുതിയ നാടകം വേണമെന്നില്ല; സ്ഥിരം നാടകവേദി സൃഷ്ടിക്കണം: മന്ത്രി സി. പി. ജോൺ*

*_ഒരു നാടകം മൂന്നോ നാലോ ദിവസം തുടർച്ചയായി അവതരിപ്പിക്കാം; അതിനായി നാടകസംഘങ്ങൾ തയ്യാറാകണം_

തിരുവനന്തപുരം: ഒരു നാടകം മൂന്നോ നാലോ ദിവസം തുടർച്ചയായി അവതരിപ്പിക്കാൻ നാടകസംഘങ്ങൾ തയ്യാറാകുകയാണെങ്കിൽ അതിനുള്ള അവസരമൊരുക്കണമെന്ന് മന്ത്രി സി. പി. ജോൺ പറഞ്ഞു. എല്ലാ ദിവസവും വ്യത്യസ്ത നാടകങ്ങൾ തന്നെ അവതരിപ്പിക്കണമെന്നില്ലെന്നും ഓരോ ദിവസവും നാടകം കാണാനെത്തുന്ന പ്രേക്ഷകർ വ്യത്യസ്തരായിരിക്കാമെന്നും അദ്ദേഹം ചൂണ്ടിക്കാട്ടി. സംസ്കാരസാഹിതി തിരുവനന്തപുരം ജില്ലാ കമ്മിറ്റിയുടെ ആഭിമുഖ്യത്തിൽ അയ്യങ്കാളി ഹാളിൽ നടക്കുന്ന സംസ്ഥാന പ്രൊഫഷണൽ നാടകോത്സവത്തിന്റെ മൂന്നാം ദിനത്തിലെ സാംസ്കാരിക സദസ്സ് ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

നാടകാവതരണങ്ങൾക്ക് സ്ഥിരമായൊരു വേദി സൃഷ്ടിക്കേണ്ടതിന്റെ ആവശ്യകതയും അദ്ദേഹം മുന്നോട്ടുവച്ചു. നാടകകലയുടെ വളർച്ചയ്ക്കും കൂടുതൽ പ്രേക്ഷകരിലേക്ക് നാടകങ്ങളെ എത്തിക്കുന്നതിനും ഇത്തരം സ്ഥിരം നാടകവേദികൾ സഹായകമാകും. അതിനായി ജനപ്രതിനിധിയെന്ന നിലയിൽ തന്റെ ഭാഗത്തുനിന്നുള്ള പരിശ്രമങ്ങൾ തുടരുമെന്നും മന്ത്രി ഉറപ്പുനൽകി.

സാംസ്കാരിക സദസ്സിൽ കെ ആർ ജി ഉണ്ണിത്താൻ, സുജിത്ത് പനങ്ങോട്, ചലച്ചിത്ര താരം അലൻസിയർ,
ആർ.  ലക്ഷ്മി, പൂഴനാട് ഗോപൻ, കെ. സുദർശൻ, തുടങ്ങിയവർ പങ്കെടുത്തു. രാത്രി ഏഴിന് കൊല്ലം എക്കോ തിയേറ്റർ അവതരിപ്പിച്ച **‘നിലാവ് പറഞ്ഞത്’** നാടകം അരങ്ങേറി.

**ഇന്നത്തെ പരിപാടികൾ**

നാടകോത്സവത്തിന്റെ നാലാം ദിനമായ ഇന്ന് രാവിലെ 10 മുതൽ കലാമത്സരങ്ങളും വൈകിട്ട് നാലുമുതൽ സാംസ്കാരിക പരിപാടികളും നടക്കും. വൈകിട്ട് 5.15ന് നടക്കുന്ന അനുമോദനച്ചടങ്ങിൽ മുതിർന്ന നാടകപ്രവർത്തകൻ കണ്ണൂർ വാസൂട്ടിക്ക് സംസ്കാരസാഹിതി നാടക പുരസ്കാരം സമ്മാനിക്കും.

മന്ത്രി കെ. മുരളീധരൻ ചടങ്ങ് ഉദ്ഘാടനം ചെയ്യും. എ. പി. അനിൽകുമാർ മുഖ്യപ്രഭാഷണം നടത്തും. രമ്യ ഹരിദാസ് എം.എൽ.എ. മുഖ്യാതിഥിയാകും. നടി പ്രവീണ പങ്കെടുക്കും. പുരസ്കാരജേതാവ് കണ്ണൂർ വാസൂട്ടി മറുപടി പ്രസംഗം നടത്തും. അഡ്വ. വി. എസ്. ശിവകുമാർ, കെ. മോഹൻകുമാർ, മാരണപുരം ശ്രീകുമാർ, ഡോ. ജി. വി. ഹരി, ആൻ സജിത റസ്സൽ തുടങ്ങിയവർ പങ്കെടുക്കും. രാത്രി ഏഴിന് കോഴിക്കോട് രംഗഭാഷയുടെ നാടകം അരങ്ങേറും.