കേരളത്തിന്റെ സാമൂഹിക-രാഷ്ട്രീയ വിപ്ലവത്തിന് വഴിയൊരുക്കിയതിൽ നാടകങ്ങൾക്ക് നിർണായക പങ്ക്: മന്ത്രി എം. ലിജു*

_കെപിഎസിയുടെ നാടകങ്ങൾ കേരളത്തിന്റെ മാറ്റങ്ങളുടെ വിത്തുപാകി; സംസ്കാരസാഹിതിയുടെ നാടകോത്സവം ശ്രദ്ധേയമായ സാംസ്കാരിക ഇടപെടൽ_

തിരുവനന്തപുരം: കേരളത്തിന്റെ സാമൂഹിക-രാഷ്ട്രീയ ചരിത്രത്തിൽ നിർണായകമായ മാറ്റങ്ങൾക്ക് വഴിയൊരുക്കിയ ശക്തമായ ജനകീയ മാധ്യമമായിരുന്നു നാടകമെന്ന് സഹകരണ-എക്സൈസ് വകുപ്പ് മന്ത്രി എം. ലിജു പറഞ്ഞു. കേരളത്തിലെ ആദ്യ കമ്മ്യൂണിസ്റ്റ് മന്ത്രിസഭ അധികാരത്തിലെത്തുന്നതിനു പിന്നിലെ സാമൂഹിക മുന്നേറ്റങ്ങളിൽ നാടകവേദി വഹിച്ച പങ്ക് ചരിത്രപരമായി പ്രാധാന്യമുള്ളതാണ്. കെപിഎസിയുടെ നാടകങ്ങൾ സമൂഹത്തിൽ സൃഷ്ടിച്ച ആശയപരമായ ഉണർവും രാഷ്ട്രീയബോധവുമാണ് വലിയ സാമൂഹിക മാറ്റങ്ങൾക്ക് വളക്കൂറുള്ള മണ്ണൊരുക്കിയത്. ‘നിങ്ങളെന്നെ കമ്മ്യൂണിസ്റ്റാക്കി’ പോലുള്ള നാടകങ്ങളും തോപ്പിൽ ഭാസിയുടെ രചനകളും അനീതികൾക്കും അസമത്വങ്ങൾക്കുമെതിരെ ജനങ്ങളെ ചിന്തിപ്പിക്കുകയും സാമൂഹിക പരിവർത്തനത്തിന് പ്രചോദനമാകുകയും ചെയ്തുവെന്ന് അദ്ദേഹം പറഞ്ഞു.

നാടകം വെറുമൊരു കലാവിഷ്കാരമല്ല, സമൂഹത്തെ ചിന്തിപ്പിക്കാനും ചോദ്യം ചെയ്യാനും മാറ്റത്തിലേക്ക് നയിക്കാനും ശേഷിയുള്ള ജനകീയ ശക്തിയാണ്. ഈ ചരിത്രപരമായ ദൗത്യം തിരിച്ചറിഞ്ഞ് നാടകത്തെ സാമൂഹിക പുരോഗതിയുടെ ഉപാധിയായി ഉയർത്തിപ്പിടിക്കുന്ന സംസ്കാരസാഹിതിയുടെ സംസ്ഥാനതല പ്രൊഫഷണൽ നാടകമത്സരം അഭിനന്ദനാർഹമാണെന്നും മന്ത്രി പറഞ്ഞു. കലയും സംസ്കാരവും സമൂഹത്തിന്റെ മുന്നേറ്റത്തിനായി പ്രയോജനപ്പെടുത്തുന്ന ഇത്തരം സംരംഭങ്ങൾ കൂടുതൽ ശക്തിപ്പെടണമെന്നും സാംസ്കാരികോത്സവം 2026 കേരളത്തിന്റെ നാടക-സാംസ്കാരിക മേഖലയിൽ പുതിയ മുന്നേറ്റങ്ങൾക്ക് വഴിയൊരുക്കട്ടെയെന്നും അദ്ദേഹം ആശംസിച്ചു.

സംസ്കാരസാഹിതി തിരുവനന്തപുരം ജില്ലാ കമ്മിറ്റിയുടെ ആഭിമുഖ്യത്തിൽ അയ്യങ്കാളി ഹാളിൽ നടക്കുന്ന സംസ്ഥാന പ്രൊഫഷണൽ നാടകോത്സവത്തിന്റെ രണ്ടാം ദിനത്തിൽ നടന്ന സാംസ്കാരിക സായാഹ്നം ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. ചടങ്ങിൽ  ചലച്ചിത്രതാരം കൊല്ലം തുളസി വിശിഷ്ടാതിഥിയായി പങ്കെടുത്തു. സംസ്കാരസാഹിതി തിരുവനന്തപുരം ജില്ലാ കൺവീനർ ഒ. എസ്. ഗിരീഷ്, പൂഴാനാട് ഗോപൻ,മണക്കാട് സുരേഷ്, മാരിടൈം എക്സ്പെർട്ട് നാണു വിശ്വനാഥൻ, റിനു വർഗീസ് തുടങ്ങിയവർ ചടങ്ങിൽ പങ്കെടുത്തു.

നാടകോത്സവത്തിന്റെ രണ്ടാം ദിനത്തിൽ  കേരള ഫോക്‌ലോർ അക്കാദമിയുടെ സഹകരണത്തോടെ പൊറാട്ടുനാടകം അരങ്ങേറി. പാലക്കാടിന്റെ തനതായ നാടൻകലാപാരമ്പര്യത്തിന്റെ ഭാഗമായ പൊറാട്ടുനാടകം നാടൻഭാഷയുടെയും സ്വാഭാവികമായ സംഭാഷണങ്ങളുടെയും കരുത്തിൽ സാമൂഹിക യാഥാർഥ്യങ്ങളെ നർമ്മത്തിലൂടെ അവതരിപ്പിച്ചു. തുടർന്ന് വൈകിട്ട് 6.30ന് സചേതന തിരുവനന്തപുരം അവതരിപ്പിച്ച ‘ഡാം’ നാടകം വേദിയിലെത്തി.

സംശയവും വഴക്കും അരങ്ങിൽ ചിരിപ്പൂരം തീർത്തു; മണി ആശാനും സംഘവും അവതരിപ്പിച്ച പൊറാട്ടുനാടകം ശ്രദ്ധേയമായി

തിരുവനന്തപുരം: സംസ്കാരസാഹിതി തിരുവനന്തപുരം ജില്ലാ കമ്മിറ്റിയുടെ ആഭിമുഖ്യത്തിൽ അയ്യങ്കാളി ഹാളിൽ നടക്കുന്ന സംസ്ഥാന പ്രൊഫഷണൽ നാടകോത്സവത്തിന്റെ രണ്ടാം ദിനത്തിൽ കേരള ഫോക്‌ലോർ അക്കാദമിയുടെ നേതൃത്വത്തിൽ അവതരിപ്പിച്ച പൊറാട്ടുനാടകം ശ്രദ്ധേയമായി. സംസ്ഥാന അവാർഡ് ജേതാവ് മണി ആശാനും സംഘവും അവതരിപ്പിച്ച നാടകം ദാമ്പത്യബന്ധത്തിലെ സംശയങ്ങളും തെറ്റിദ്ധാരണകളും തുടർന്നുണ്ടാകുന്ന വഴക്കുകളും നർമ്മത്തിൽ ചാലിച്ചാണ് അരങ്ങിലെത്തിച്ചത്.

അലക്കുകാരനും അലക്കുകാരിയും തമ്മിലുള്ള സംശയവും അതിനെത്തുടർന്നുണ്ടാകുന്ന സംഘർഷങ്ങളുമായിരുന്നു നാടകത്തിന്റെ പ്രമേയം. സാധാരണക്കാരുടെ ജീവിതസാഹചര്യങ്ങളും ബന്ധങ്ങളിലെ സങ്കീർണതകളും ഹാസ്യത്തിലൂടെയും ആക്ഷേപഹാസ്യത്തിലൂടെയും അവതരിപ്പിക്കുന്ന പൊറാട്ടുനാടകത്തിന്റെ തനതുശൈലി പ്രകടനത്തിൽ തെളിഞ്ഞുനിന്നു. പരസ്പരവിശ്വാസക്കുറവും തെറ്റിദ്ധാരണകളും എങ്ങനെ ചെറിയ പ്രശ്നങ്ങളെ വലിയ സംഘർഷങ്ങളാക്കി മാറ്റുന്നു എന്നത് രസകരമായ രംഗങ്ങളിലൂടെ നാടകം വരച്ചുകാട്ടി.

പാലക്കാടിന്റെ തനതായ നാടൻകലാപാരമ്പര്യത്തിന്റെ ഭാഗമായ പൊറാട്ടുനാടകത്തിൽ നാടൻഭാഷയും സ്വാഭാവികമായ സംഭാഷണങ്ങളും കഥാപാത്രങ്ങളുടെ അവതരണവും ഒത്തുചേർന്നു. ചിരിയിലൂടെ സാമൂഹിക യാഥാർഥ്യങ്ങളെ അവതരിപ്പിച്ച ഈ കലാരൂപം നാടൻകലയുടെ തനിമയും പ്രസക്തിയും ഒരിക്കൽക്കൂടി അടയാളപ്പെടുത്തി.

വേലായുധൻ കൊല്ലങ്കോട്, സുരേഷ് കൊല്ലങ്കോട്, ഹരീഷ് മുതലമട, മാണിക്യൻ നെന്മാറ, രാജേഷ് നന്നിയോട്, മനോജ് കാമ്പറത്ത്ചല്ല എന്നിവർ അവതരണത്തിൽ പങ്കെടുത്തു.