പ്രൊഫ. മൂഴിക്കുളം വി. ചന്ദ്രശേഖരപിള്ളയുടെ 107-ാമത് ജന്മദിനാഘോഷം: ‘ചന്ദ്രകളഭം’ പോസ്റ്റർ പ്രകാശനം ചെയ്തു

മണ്ണാറശാല: കലാനിധി ഇന്ത്യൻ ആർട്സ് ആൻഡ് കൾച്ചറൽ ഹെറിറ്റേജ് ട്രസ്റ്റിന്റെ സ്ഥാപകനും മണ്ണാറശാല ശ്രീ നാഗരാജാ ക്ഷേത്രത്തിലെ മുൻ കാരണവരുമായിരുന്ന കേശവൻ നമ്പൂതിരിയുടെ മകനുമായ പ്രൊഫ. മൂഴിക്കുളം വി. ചന്ദ്രശേഖരപിള്ളയുടെ 107-ാമത് ജന്മദിനാഘോഷങ്ങളുടെ പോസ്റ്റർ ‘ചന്ദ്രകളഭം’ പ്രകാശനം ചെയ്തു.

മണ്ണാറശാല അമ്മ ദിവ്യശ്രീ സാവിത്രി അന്തർജനത്തിന്റെ ജന്മദിനമായ ജൂലൈ 27-ന് മണ്ണാറശാല ക്ഷേത്ര തിരുസന്നിധിയിൽ വെച്ച് നടന്ന പുണ്യച്ചടങ്ങിൽ അമ്മയാണ് പോസ്റ്റർ പ്രകാശനം നിർവ്വഹിച്ചത്. ചടങ്ങിൽഅമ്മയുടെ മകൻ നാഗദാസ് നമ്പൂതിരിയുടെ സഹധർമ്മിണി ശ്രീദേവി അന്തർജനം ആദ്യപ്രതി ഏറ്റുവാങ്ങി. മണ്ണാറശാല അമ്മയുടെ മംഗളകരമായ ജന്മദിനത്തോടനുബന്ധിച്ച് ശ്രീ ഗുരുവായൂരപ്പന്റെ വിഗ്രഹം കാലനിധി ട്രസ്റ്റ്‌ ചെയർപേഴ്സണും മാനേജിങ് ട്രസ്റ്റിയുമായ ഗീതാരാജേന്ദ്രൻ അമ്മയ്ക്ക് സമർപ്പിച്ചു.

ജന്മദിനാഘോഷങ്ങൾക്ക് നവംബർ 7-ന് ഗുരുവായൂർ ക്ഷേത്ര തിരുസന്നിധിയിൽ ഭദ്രദീപം തെളിയിച്ചുകൊണ്ട് തുടക്കമാകുമെന്ന് കാലനിധി മാനേജിങ് ട്രസ്റ്റി ഗീത രാജേന്ദ്രൻ പത്രകുറിപ്പിൽ അറിയിച്ചു. ചടങ്ങിൽ വെച്ച് പ്രശസ്തമായ ‘ചന്ദ്രകളഭം’ കാവ്യാസമാഹാരവും നാഗധ്വനി പുരസ്കാര സമർപ്പണവും മാധ്യമരംഗത്തെ മികവിന് നൽകുന്ന മാധ്യമ പുരസ്‌കാരവുംനൃത്ത സംഗീത സാമന്വയവും സംഘടിപ്പിക്കും 107 കലാ-സാംസ്കാരിക-സാഹിത്യ രംഗത്തെ പ്രമുഖരെ ചടങ്ങിൽ ആദരിക്കും.

പോസ്റ്റർ പ്രകാശനച്ചടങ്ങിൽമണ്ണാറശാല അമ്മയുടെ മക്കളായ വാസൻ നമ്പൂതിരി,ശങ്കരൻ നമ്പൂതിരി, ശ്രീദേവി അന്തർജനം മരുമക്കളായ ഉമാദേവി അന്തർജനം, ശ്രീദേവി അന്തർജനം, കാലനിധി അംഗങ്ങളായ രമ്യ എസ്. ആർ., മഹാദേവ് എസ്. നായർ, കേരളത്തിലെ ഏറ്റവും പ്രായം കുറഞ്ഞ വഞ്ചിപ്പാട്ട് കലാകാരനും കാലനിധി ബാല കലാപ്രതിഭയുമായ മാസ്റ്റർ അർജുൻ പാർത്ഥസാരഥി (അർജുൻ സാരഥി) എന്നിവരും നിരവധി ഭക്തജനങ്ങളും പങ്കെടുത്തു….