അബ്ദുല്ല അക്കാദമി വാർഷിക സമ്മേളനം ഇന്ന് പ്രൗഢമാകും

കോതകുറുശ്ശി: ദാറുൽ ഖുർആൻ അബ്ദുല്ല അക്കാദമിയുടെ പതിനൊന്നാം വാർഷികവും സമസ്ത ശതാബ്ദി സമ്മേളന പ്രചാരണ സംഗമവും ഇന്ന് സ്ഥാപനാങ്കണത്തിൽ സജ്ജമാക്കിയ മീരാൻ ഔലിയ നഗറിൽ വെച്ചു നടക്കും. രാവിലെ ഒമ്പതു മണിക്ക് അനങ്ങന്നടി മഖാം സിയാറത്തിനു ശേഷം പതാക ഉയർത്തുന്നതോടെ തുടക്കമാകുന്ന സമ്മേളനം വിവിധ സെഷനുകളോടെ രാത്രി വരെ നീണ്ടുനിൽക്കും. സമാപന സംഗമം പാണക്കാട് സയ്യിദ് മുഈനലി ശിഹാബ് തങ്ങൾ ഉദ്ഘാടനം ചെയ്യും. ശൈഖുനാ നെല്ലായ ഉസ്താദ് പ്രാർത്ഥന നിർവഹിക്കും. സിംസാറുൽ ഹഖ് ഹുദവി മുഖ്യപ്രഭാഷണം നടത്തും.

അസർ നമസ്കാര ശേഷം സംഘടിപ്പിക്കുന്ന മജ്ലിസുന്നൂറിനു സയ്യിദ് ഹുസൈൻ ശിഹാബ് തങ്ങൾ കൊളത്തൂർ നേതൃത്വം നൽകും. ശേഷം നടക്കുന്ന സമസ്ത കേരള ജംഇയ്യത്തുൽ ഉലമയുടെ ശതാബ്ദി സമ്മേളന പ്രചാരണ സംഗമത്തിൽ ‘ആദർശവിശുദ്ധി നൂറ്റാണ്ടുകളിലൂടെ’ എന്ന പ്രമേയത്തെ അധികരിച്ച് സ്വലാഹുദ്ദീൻ ഫൈസി വല്ലപ്പുഴ പ്രഭാഷണം നടത്തും. ഖാജാ ദാരിമി തൂത ആധ്യക്ഷം വഹിക്കുന്ന സംഗമം മുഹമ്മദ് ഹസീബ് ഫൈസി വല്ലപ്പുഴ ഉദ്ഘാടനം ചെയ്യും.

സമസ്ത പാലക്കാട് ജില്ലാ മുശാവറ മെമ്പർമാരായി തെരഞ്ഞെടുക്കപ്പെട്ട ഉണ്ണീൻകുട്ടി മുസ്‌ലിയാർ പനമണ്ണ, അലവി മുസ്‌ലിയാർ പനമണ്ണ എന്നിവരെ സമ്മേളനത്തിൽ വെച്ച് ആദരിക്കും. ദാറുൽ ഖുർആൻ അബ്ദുല്ല അക്കാദമി ചെയർമാൻ ഡോ. പി.ടി അബ്ദുറഹ്‌മാൻ മുഹമ്മദ്‌, പ്രിൻസിപ്പാൾ മുഹമ്മദ്‌ മുസ്തഫ മന്നാനി, മുസ്തഫ മുസ്‌ലിയാർ വല്ലപ്പുഴ തുടങ്ങി നിരവധി പ്രമുഖ വ്യക്തിത്വങ്ങളും പണ്ഡിതന്മാരും വിവിധ സെഷനുകളിലായി സംബന്ധിക്കും. സമ്മേളനത്തിന്റെ ഭാഗമായി ഖിറാഅത്ത് മത്സരവും പൂർവ്വവിദ്യാർത്ഥി സംഗമവും സൗജന്യ നേത്ര പരിശോധനാ ക്യാമ്പും നടക്കും.