കേരളത്തില് ശക്തമായ മഴയ്ക്ക് സാധ്യതയെന്ന് മുന്നറിയിപ്പ്
6 ജില്ലകളില് യെല്ലോ അലര്ട്ടും ഉണ്ട്. പത്തനംതിട്ട, എറണാകുളം, ഇടുക്കി, തൃശ്ശൂര്, പാലക്കാട്, മലപ്പുറം ജില്ലകളിലാണ് യെല്ലോ അലര്ട്ട്. സംസ്ഥാനത്ത് ഒറ്റപ്പെട്ടയിടങ്ങളില് ശക്തമായ മഴ പെയ്യാനാണ് സാധ്യത. കിഴക്കന് മേഖലകളിലാണ് കൂടുതല് മഴ സാധ്യത.കടല് പ്രക്ഷുബ്ധമാകാന് സാധ്യതയുള്ളതിനാല് മത്സ്യത്തൊഴിലാളികള് കടലില് പോകരുതെന്ന് ജാഗ്രത നിര്ദ്ദേശമുണ്ട്. കര്ണ്ണാടക തീരത്തായുള്ള ന്യൂനമര്ദ്ദപാത്തിയുടെ സ്വാധീന ഫലമായാണ് നിലവിലെ മഴ. എന്നാല്, നാളെയോടെ മഴ കുറയും. ശനിയാഴ്ചയോടെ തെക്ക്-കിഴക്കന് ബംഗാള് ഉള്ക്കടലില് ചക്രവാതച്ചുഴി രൂപപ്പെടും. പിന്നീടുള്ള 48 മണിക്കൂറില് ഇത് ന്യൂനമര്ദ്ദമായി മാറും. നേരിട്ട് ബാധിക്കില്ലെങ്കിലും ഈ ന്യൂനമര്ദ്ദത്തിന്റെ സ്വാധീനഫലമായി അടുത്തയാഴ്ച മഴ വീണ്ടും സജീവമാകാനാണ് സാധ്യത.