പാവങ്ങളുടെ ‘ലംബോര്ഗിനി’
തൊടുപുഴ: ഇടുക്കി സേനാപതി കേളംകുഴയ്ക്കല് അനസിന് സ്വന്തം വീട്ടുമുറ്റത്ത് ഇതുപോലൊരു കാര് ഉണ്ടായിരുന്നെങ്കില് എന്ന മോഹം തോന്നി തുടങ്ങിയത് നടന് പൃഥ്വിരാജിെന്റ ലംബോര്ഗിനിയെക്കുറിച്ചുള്ള വിശേഷങ്ങള് കേട്ടപ്പോഴാണ് .എന്നാല് അമ്മയോട് കാര്യം പറഞ്ഞപ്പോള് കയറിക്കിടക്കാന് വീടാണോ കാറാണോ വേണ്ടതെന്നായിരുന്നു മറുചോദ്യം. പിന്നീട് സ്വപ്നം കാണാന് കഴിയാത്ത വിലയാണെന്നത് കൊണ്ട് തന്നെ ഇതുപോലൊന്ന് നിര്മിച്ചാലെന്താ എന്നായി ചിന്ത.ഒടുവില് തന്റെ ആഗ്രഹം ഒന്നര വര്ഷത്തിന് ശേഷം അനസ് പൂര്ത്തീകരിച്ചു.വീട്ടുമുറ്റത്ത് ഇപ്പോള് സ്വന്തമായി ഈ ചെറുപ്പക്കാരന് ‘ലംബോര്ഗിനി’ ഉണ്ട്. ഒറ്റ നോട്ടത്തില് ലംബോര്ഗിനി എന്ന് തോന്നിക്കുന്ന ഈ കാറിന്റെ മാതൃക സമൂഹ മാധ്യമങ്ങളിലിപ്പോള് വൈറലാണ്.ചെറുപ്പം മുതലേ വാഹനങ്ങളോട് അഭിനിവേശമുള്ള അനസ് 2019ല് പാലക്കാടുനിന്ന് എം.ബി.എ പൂര്ത്തിയാക്കി മംഗലാപുരത്ത് ഒരു കമ്ബനിയില് ജോലിക്ക് കയറിയെങ്കിലും വാഹനം നിര്മിക്കണമെന്ന ആഗ്രഹം അനസിന്റെ മനസ്സിനെ വല്ലാതെ അലട്ടി. ഒടുവില് തന്റെ സ്വപ്ന സാക്ഷാത്കാരത്തിനായി ഒരു മാസത്തിനകം അവിടെ നിന്നിറങ്ങി. ആലുവയിലെ ഒരു യൂസ്ഡ് കാര് ഷോറൂമില് എത്തി മാനേജരോട് അനുമതി ചോദിച്ച് ലംബോര്ഗിനി കണ്ടു.തിരികെ ഇടുക്കിയിലേക്ക് വണ്ടി കയറുമ്ബോള് ഇതുപോലൊരു കാറുണ്ടാക്കുമെന്ന് ഉറപ്പിച്ചിരുന്നു. ഏറെ ദിവസത്തെ ചര്ച്ചകള്ക്കുശേഷം മകന്റെ അടങ്ങാത്ത ആഗ്രഹത്തിന് മുന്നില് അമ്മ മേഴ്സിയും വഴങ്ങി. അമ്മ നല്കിയ എഴുപതിനായിരവും കേറ്ററിങ്ങിനും പന്തല് പണിക്കുമൊക്കെ പോയി ലഭിച്ച തുകയും ഉപയോഗിച്ച് അനസ് ‘ലംബോര്ഗിനി’യുടെ പണി തുടങ്ങി.ഒന്നര വര്ഷമെടുത്തു കാറിന്റെ പണി പൂര്ത്തിയാക്കി. ഒറ്റ നോട്ടത്തില് ലംബോര്ഗിനി തന്നെയെന്ന് തോന്നിപ്പിക്കുന്ന രീതിയിലാണ് നിര്മാണം. 110 സി.സി ബൈക്കിന്റെ എന്ജിനാണ് അതില് ഉപയോഗിച്ചിരിക്കുന്നത്.പഴയ പ്ലാസ്റ്റിക് വസ്തുക്കളും ഫ്ലെക്സും വരെ നിര്മാണത്തിനായി അനസ് ഉപയോഗിച്ചു. ഡിസ്ക് ബ്രേക്ക്, പവര് വിന്ഡോ, സണ് റൂഫ്, മുന്നിലും പിന്നിലും കാമറകള് തുടങ്ങി ഒരു ആഡംബര വാഹനത്തിലെ സൗകര്യങ്ങളെല്ലാം അനസിന്റെ കാറിലുണ്ട്. ഇപ്പോള് രണ്ട് ലക്ഷത്തോളം രൂപ ചിലവായി.നിരത്തിലിറക്കാന് കഴിയില്ലെങ്കിലും വീടിന് ചുറ്റിനുമാണ് അനസിന്റെ ‘ലംബോര്ഗിനി’യുടെ കറക്കം. വിഡിയോ സമൂഹമാധ്യമങ്ങളില് തരംഗമായതോടെ ലംബോര്ഗിനിയുടെ ബംഗളൂരുവിലെ ഓഫിസില്നിന്ന് വിളിക്കുകയും അഭിനന്ദിക്കുകയും ചെയ്തതായി അനസ് പറഞ്ഞു.