ഐ എ എം ഇ ടാലന്റ് ഇനീഷ്യേറ്റീവ് കേരളത്തിലെ ഇംഗ്ലീഷ് മീഡിയം വിദ്യാർത്ഥികൾക്കുള്ള സ്കോളർഷിപ്പ്

തിരുവനന്തപുരം | ന്യൂനപക്ഷ മാനേജ്മെന്റുകൾക്ക് കീഴിൽ നടത്തപ്പെടുന്ന ഇംഗ്ലീഷ് മീഡിയം സ്കൂളുകളുടെ കൂട്ടായ്മയായ ഐ എ എം ഇയുടെ ആഭിമുഖ്യത്തിൽ ടാലന്റ് ഇനീഷ്യേറ്റീവ് പദ്ധതിക്ക് തുടക്കം കുറിക്കുന്നു. കേരളത്തിലെ സിബിഎസ്ഇ അംഗീകാരമുള്ള സ്കൂളുകളിലെ വിദ്യാർത്ഥികളുടെ നൈപുണി വികസിപ്പിക്കുന്നതിനും ഐ എ എസ്‌, ഐ പി എസ് പോലെയുള്ള ഉന്നത തലത്തിലുള്ള മത്സരാധിഷ്ഠിത പരീക്ഷകൾ എഴുതാൻ വിദ്യാർത്ഥികളെ പാകപ്പെടുത്തുന്നതിനും ലക്ഷ്യമിട്ടാണ് ഐ എ എം ഇ ടാലന്റ് ഇനീഷ്യേറ്റീവ് പദ്ധതി നടപ്പിലാക്കുന്നത്. എൽ പി തലത്തിൽ എൽ ടി എസ്സും യു പി തലത്തിൽ യു ടി എസ്സുമാണ് പ്രാരംഭ തലത്തിൽ നടപ്പിലാക്കുന്നത്.2006 മുതൽ വിജയകരമായി നടത്തി വരുന്ന ടാലന്റ് സെർച്ച് പരീക്ഷയായ ഇന്റർനാഷണൽ സ്കിൽ എൻഹാൻസ്മെന്റ് ട്രൈയിനിംഗിൽ (ഐസെറ്റ്) പങ്കെടുത്ത് ഉന്നത വിജയം നേടുന്നവരെയാണ് ടാലന്റ് ഇനീഷ്യേറ്റീവിലേക്ക് തെരഞ്ഞെടുക്കുന്നത്.വിദ്യാർത്ഥികൾക്ക് ഭൗതികവും പഠന രംഗത്തെ മികവും പ്രകടിപ്പിക്കാനുള്ള മികച്ച ഒരു അവസരമായാണ് ഇതിനെ കണക്കാക്കുന്നത്. ദേശീയ പാഠ്യ പദ്ധതി ചട്ടക്കൂട് (എൻ സി എഫ്) ഓരോ ക്ലാസിലേക്കും നിർദ്ദേശിക്കുന്ന അടിസ്ഥാന ശേഷികളേയും അറിവുകളേയും അടിസ്ഥാനമാക്കിയും, ജനറൽ നോളജ്, കറന്റ് അഫയേഴ്സ്, മെന്റൽ എബിലിറ്റി, ന്യൂമെറിക്കൽ റീസണിംഗ്, നോൺ വെർബൽ റീസണിംഗ്, ആക്ടിവിറ്റി ബെയ്സ്ഡ് ക്വൊസ്റ്റ്യൻസ് എന്നിവ ഉൾപ്പെടുത്തിയാണ് ഇതിന്റെ സിലബസ് തയ്യാറാക്കിയത്. കെ ജി ക്ലാസുകളിൽ കുട്ടികളുടെ കളറിംഗ് സ്കിൽ, ഡ്രോയിംഗ് സ്കിൽ എന്നിവക്ക് കൂടി പ്രാധാന്യം നൽകുന്നുണ്ട്.സ്കൂൾ തലത്തിൽ നടക്കുന്ന ഒന്നാം ഘട്ട പരീക്ഷയിൽ ഉന്നത നിലവാരം പുലർത്തുന്ന വർക്ക് മെറിറ്റ് സർട്ടിഫിക്കറ്റും മെഡലുകളും സമ്മാനിക്കും. പങ്കെടുത്ത എല്ലാ വിദ്യാർത്ഥികൾക്കും പാർട്ടിസിപ്പേഷൻ സർട്ടിഫിക്കറ്റും നൽകുന്നുണ്ട്. സ്കൂൾ തലത്തിൽ നടന്ന പരീക്ഷയിൽ നാലാം ക്ലാസിൽ നിന്നും ഏഴാം ക്ലാസിൽ നിന്നും തിരഞ്ഞെടുക്കുന്ന വിദ്യാർത്ഥികളെ പങ്കെടുപ്പിച്ച് നടക്കുന്ന രണ്ടാം ഘട്ട ടെസ്റ്റിൽ ഉയർന്ന നിലവാരം പുലർത്തുന്നവർക്ക് എൽ ടി എസ്, യു ടി എസ് സ്കോളർഷിപ്പ് നൽകും. 6 മുതൽ പ്ലസ് ടു വരെയുള്ള വിദ്യാർത്ഥികളിൽ നിന്ന് ഉന്നത വിജയം നേടിയ വിദ്യാർത്ഥികളെ പങ്കെടുപ്പിച്ച് ഐസെറ്റ് ഗ്രാന്റ് ഫിനാലെ സംഘടിപ്പിക്കും. രണ്ട് കാറ്റഗറികളിലുമായി നടക്കുന്ന ഗ്രാന്റ് ഫിനാലെ മത്സര വിജയികൾക്ക് 916 സ്വർണ നാണയം സമ്മാനമായി ലഭിക്കും.

പങ്കെടുത്തവർ
സയ്യിദ് മുഹമ്മദ് തുറാബ് തങ്ങൾ (പ്രസിഡന്റ്, ഐ എ എം ഇ)
പ്രൊഫസർ എ കെ അബ്ദുൽ ഹമീദ് (ഫിനാൻസ് സെക്രട്ടറി, ഐ എ എം ഇ)
അഫ്സൽ കൊളാരി (എക്സിക്യൂട്ടീവ് ഡയറക്ടർ, ഐ എ എം ഇ)