മാമ്പഴം കഴിക്കുന്നതിന് മുൻപ് 30 മിനിറ്റ് വെള്ളത്തില് കുതിര്ക്കണം
തേൻ മധുരമുള്ള അല്ഫോൻസോ മുതല് ദശേരി വരെയുള്ള വൈവിധ്യമാർന്ന മാമ്പഴങ്ങള് നമ്മുടെ ഭക്ഷണക്രമത്തിന്റെ പ്രധാന ഭാഗമാണ്.
എന്നാല് മാമ്പഴം കഴിക്കുന്നതിന് മുൻപ് വെള്ളത്തില് ഇട്ടുവെക്കുന്ന ഒരു പരമ്പരാഗത ശീലം ചില വീടുകളിലുണ്ട്. ഈ ശീലത്തിന് പിന്നില് ചില ശാസ്ത്രീയ കാരണങ്ങളുണ്ട്. മാമ്പഴം വെറുതെ കഴുകി വൃത്തിയാക്കുക എന്നതിലുപരി, അതിലെ പോഷകങ്ങള് ശരീരം പൂർണ്ണമായി ആഗിരണം ചെയ്യാനും, ശരീര താപനില നിയന്ത്രിക്കാനും, ദഹനപ്രശ്നങ്ങള് തടയാനും മാമ്പഴം വെള്ളത്തില് കുതിർക്കുന്നത് ഗുണകരമാണ്. വിറ്റാമിൻ എ, സി, ഫൈബർ എന്നിവയാല് സമ്പന്നമാണെങ്കിലും, മാമ്പഴത്തിന്റെ പുറംഭാഗത്തുള്ള ചില ഘടകങ്ങള് ദഹനത്തെ ബാധിക്കാതിരിക്കാൻ ഈ മുൻകരുതല് ആവശ്യമാണ്. മാമ്പഴം വെള്ളത്തില് കുതിർത്ത് വെക്കുന്നത് കൊണ്ടുള്ള 4 പ്രധാന ആരോഗ്യ ഗുണങ്ങള് ഇതാണ്.
1. ഫൈറ്റിക് ആസിഡിന്റെ ദോഷങ്ങള് ഇല്ലാതാക്കുന്നു
മാമ്പഴം വെള്ളത്തില് വെക്കാൻ പറയുന്നതിന് പിന്നിലെ പ്രധാന കാരണം അതിലടങ്ങിയിരിക്കുന്ന ഫൈറ്റിക് ആസിഡ് ആണ്. സസ്യങ്ങളില് സ്വാഭാവികമായി കാണപ്പെടുന്ന ഈ ഘടകത്തെ പോഷകാഹാര ശാസ്ത്രത്തില് ഒരു ആന്റി-ന്യൂട്രിയന്റ് അഥവാ പോഷക വിരുദ്ധ ഘടകമായാണ് കണക്കാക്കുന്നത്.
2. ശരീര താപനിലയും ദഹനപ്രശ്നങ്ങളും നിയന്ത്രിക്കുന്നു
ചില ഭക്ഷണങ്ങള് ദഹിക്കുമ്പോള് ശരീരത്തില് സ്വാഭാവികമായി ചൂട് വർദ്ധിപ്പിക്കാറുണ്ട്. മാമ്പഴത്തില് കലോറിയും സ്വാഭാവിക മധുരവും കൂടുതലായതിനാല്, ഇത് അമിതമായി കഴിക്കുന്നത് ശരീരത്തിലെ ചൂട് കൂട്ടും. കൂടാതെ അസിഡിറ്റി, നെഞ്ചെരിച്ചില്, വയർ വീർക്കല് തുടങ്ങിയ ദഹനപ്രശ്നങ്ങള്ക്കും ഇത് കാരണമായേക്കാം. അതേസമയം മാമ്പഴം തണുത്ത വെള്ളത്തിലോ സാധാരണ വെള്ളത്തിലോ കുതിർത്ത് വെക്കുമ്പോള് അതിന്റെ സ്വാഭാവിക ചൂട് കുറയുന്നു.
3. കീടനാശിനികളും രാസവസ്തുക്കളും നീക്കം ചെയ്യുന്നു
ഇന്നത്തെ കൃഷിരീതികളില് കീടനാശിനികളും കൃത്രിമമായി പഴുപ്പിക്കാനുള്ള രാസവസ്തുക്കളും വ്യാപകമായി ഉപയോഗിക്കാറുണ്ട്. മാമ്പഴം പഴുപ്പിക്കാൻ ഉപയോഗിക്കുന്ന കാല്സ്യം കാർബൈഡ് ചർമ്മത്തിന് ദോഷകരമായ ആർസെനിക്, ഫോസ്ഫറസ് എന്നിവയുടെ അംശങ്ങള് അവശേഷിപ്പിക്കാം. അതിനാല് അല്പനേരം വെള്ളത്തിലിട്ടു വെയ്ക്കുന്നത് നല്ലതാണ്.
4. മാമ്പഴത്തിന്റെ ഗുണമേന്മയും ഈർപ്പവും വർദ്ധിപ്പിക്കുന്നു
വിളവെടുപ്പിനും സംഭരണത്തിനും ശേഷം മാമ്പഴത്തിലെ ഈർപ്പത്തിന്റെ അളവ് കുറയാൻ സാധ്യതയുണ്ട്. വെള്ളത്തില് ഇട്ടുവെക്കുമ്പോള് മാമ്പഴത്തിന്റെ തൊലിയും ഉള്ളിലെ കാമ്പും വീണ്ടും ആവശ്യത്തിന് ജലാംശം വലിച്ചെടുക്കുന്നു. ഇത് മാമ്പഴം കൂടുതല് മൃദുവാക്കാനും, തൊലി എളുപ്പത്തില് കളയാനും, പഴം കൂടുതല് സ്വാദുള്ളതാക്കാനും സഹായിക്കും.