കേരള ക്യാൻസർ കോൺക്ലേവ് 2025 ജൂൺ 28 ശനിയാഴ്ച കേരളാ നിയമസഭാ സ്പീക്കർ എ എം ഷംസീർ ഉദ്ഘാടനം ചെയ്യും
തിരുവനന്തപുരം : അർബുദരോഗ ചികിത്സയുടെ പുതിയ വെല്ലുവിളികളും സാധ്യതകളും തേടുന്ന കേരള ക്യാൻസർ കോൺക്ലേവിന് 2025 ജൂൺ 28 ശനിയാഴ്ച തുടക്കം കുറിക്കും . രണ്ട് ദിവസം നീണ്ടു നിൽക്കുന്ന കോൺക്ലേവ് അർബുദരോഗ ചികിത്സയുടെ നൂതന സാധ്യതകൾ തേടുന്നതായിരിക്കും. തിരുവനന്തപുരം ഹോട്ടൽ ഹയാത്ത് റീജൻസിയാണ് കേരള ക്യാൻസർ കോൺക്ലേവിന് വേദിയാവുന്നത് .
രാജ്യത്ത് തന്നെ ഇദംപ്രഥമമായി നടക്കുന്ന കേരള ക്യാൻസർ കോൺക്ലേവ് ജൂൺ 28 ശനിയാഴ്ച രാവിലെ 10 മണിക്ക് കേരളാ നിയമസഭാ സ്പീക്കർ എ എം ഷംസീർ ഉദ്ഘാടനം ചെയ്യും . ചടങ്ങിൽ ഇന്ത്യയിൽ കാൻസർ രോഗത്തിന്റെ പിതാവ് എന്നറിയപ്പെടുന്ന പത്മഭൂഷൺ ഡോ സുരേഷ് എച്ച് .അഡ്വാനി മുഖ്യാതിഥിയായിരിക്കും .പാലിയം ഇന്ത്യ സ്ഥാപകൻ പത്മശ്രീ ഡോ രാജഗോപാൽ , രാജീവ് ഗാന്ധി സെന്റർ ഫോർ ബയോടെക്നോളജി ഡയറക്ടർ പ്രൊഫ. ചന്ദ്രഭാസ് നാരായണ, ടാറ്റാ മെമ്മോറിയൽ ഹോസ്പിറ്റൽ മുംബൈ ഡയറക്ടർ ഡോ. സി എസ്. പ്രമീഷ് , മലബാർ കാൻസർ സെന്റർ ഡയറക്ടർ ഡോ. സതീശൻ, കാത്തലിക് ഹോസ്പിറ്റൽസ് ഓഫ് ഇന്ത്യ കേരള ഘടകം പ്രസിഡണ്ട് ഫാ ഡോ ബിനു കുന്നത്ത് ,ഡോ ബോബൻ തോമസ്, ഡോ നാരായണൻ കുട്ടി വാര്യർ,ഡോ. അജു മാത്യു എന്നിവർ സംസാരിക്കും
അസോസിയേഷൻ ഓഫ് മെഡിക്കൽ ആൻഡ് പീഡിയാട്രിക് ഓങ്കോളജിസ്റ്റ് ഓഫ് കേരളയുടെ നേതൃത്വത്തിലാണ് ഇന്ത്യക്ക് അകത്തും പുറത്തും നിന്നുമായി ഇരുനൂറിലധികം അർബുദ രോഗ ചികിത്സാവിദഗ്ദ്ധർ പങ്കെടുക്കുന്ന കേരള ക്യാൻസർ കോൺക്ലേവ് 2025 സംഘടിപ്പിച്ചിരിക്കുന്നത്. രണ്ട് ദിവസം നീണ്ടു നിൽക്കുന്ന കേരള ക്യാൻസർ കോൺക്ലേവിൽ ഏഴ് വിഭാഗങ്ങളിലായി അർബുദരോഗത്തെ കുറിച്ചുള്ള സുപ്രധാന വിഷയങ്ങളിൽ ചർച്ചകൾ നടക്കും .
അർബുദ ചികിത്സാ മേഖലയിലെ പ്രശസ്ത ഡോക്ടർമാരായ അമേരിക്കയിലെ മായോ ക്ലിനിക്കിൽ നിന്നുള്ള ഡോ. ഷാജി കുമാർ, അമേരിക്കയിലെ തന്നെ റോസ് വെൽ പാർക്കിൽ നിന്നുള്ള ഡോ. സാബി ജോർജ്, ഡോ. എം.വി. പിള്ള, ഡോ. ബെൻ ജോർജ്, ഡോ. ജെമി എബ്രഹാം തുടങ്ങിയവർ ചർച്ചകളിൽ പങ്കെടുക്കും. ടാറ്റാ മെമ്മോറിയൽ ഹോസ്പിറ്റൽ മുംബൈ ഡയറക്ടർ ഡോ. പ്രമീഷ് സി.എസ്., മലബാർ ക്യാൻസർ സെന്റർ ഡയറക്ടർ ഡോ സതീശൻ, ചെന്നൈ അപ്പോളോ പ്രോട്ടോൺ സെന്ററിലെ വിദഗ്ദ്ധൻ ഡോ.രാകേഷ് ജലാലി, ഡോ എസ്.എസ്. ലാൽ , ഡോ. എം.ആർ. രാജഗോപാൽ, ജയന്ത് മാമൻ മാത്യു , മുരളി തുമ്മാരകുടി, ഡോ. ഭാവന സിരോഹി തുടങ്ങിയവർ പങ്കെടുത്തു സംസാരിക്കും.
കേരള ക്യാൻസർ കോൺക്ലേവ് 2025 ന്റെ ഭാഗമായിസംഘടിപ്പിച്ച cancer opinion survey യുടെ പ്രകാശനവും ചടങ്ങിൽ നടക്കും. കേരളത്തിലെ കാൻസർ രോഗികളുടെ സ്ഥിതിവിവര കണക്കുകളുടെ അടിസ്ഥാനത്തിൽ കാൻസർ രോഗ ചികിത്സ കേരളത്തിൽ നേരിടുന്ന വെല്ലുവിളികളും സാധ്യതകളും വിശകലനം ചെയ്യപ്പെടും . കാൻസർ രോഗ നിയന്ത്രണ പ്രവർത്തനങ്ങളിലെ മാധ്യമങ്ങളുടെ ഉപയോഗവും ദുരുപയോഗവും, അർബുദ രോഗ ചികിത്സയിൽ മരുന്നുകളുടെ ഉപയോഗത്തിൽ വരുത്തേണ്ട മാറ്റങ്ങൾ, ക്യാൻസർ ചികിത്സാ മേഖലയുടെ പ്രാപ്യത, ഇൻഷ്വറൻസ് തുടങ്ങിയ സൗകര്യങ്ങളുടെ ലഭ്യത, കാൻസർ ചികിത്സാ മേഖലയിൽ നടക്കുന്ന ഗവേഷങ്ങളുടെയും തുടർ പഠനങ്ങളുടെയും ആവശ്യകത, കാൻസർ പരിചരണത്തിലെ ജീനോമിക്സും പ്രിസിഷൻ മെഡിസിനും; പൂർണ്ണമായ സാധ്യതകൾ എന്നിവ കോൺക്ലേവിൽ പ്രധാന ചർച്ചാ വിഷയങ്ങളായി മാറുമെന്ന് അസോസിയേഷൻ ഓഫ് മെഡിക്കൽ ആൻഡ് പീഡിയാട്രിക് ഓങ്കോളജിസ്റ്റ് ഓഫ് കേരള ഭാരവാഹികളായ ഡോ ബോബൻ തോമസ് , ഡോ അജു മാത്യു എന്നിവർ അഭിപ്രായപ്പെട്ടു.
കേരള ക്യാൻസർ കോൺക്ലേവ് 2025 ഉദ്ഘാടനം ബി ഡി ദത്തന്റെ ചിത്രരചനയോടൊപ്പം
കേരള ക്യാൻസർ കോൺക്ലേവ് 2025 വേദിയിൽ പ്രശസ്ത ചിത്രകാരൻ ബി.ഡി. ദത്തന്റെ തൽത്സമയ ചിത്രരചനയും നടക്കും. ക്യാൻസർ ബോധവത്കരണത്തിന്റെ ഭാഗമായാണ് ചിത്രരചന സംഘടിപ്പിക്കപ്പെടുന്നത്.