പ്രമുഖ റീട്ടെയിലര്മാരായ ലുലു ഗ്രൂപ് കശ്മീരില് ഭക്ഷ്യസംസ്കരണ ശാല തുടങ്ങുന്നു
യു.എ.ഇയിലെത്തിയ കശ്മീര് സര്ക്കാര് പ്രതിനിധികളുമായുള്ള കൂടിക്കാഴ്ചക്കുശേഷം ലുലു ഗ്രൂപ് ചെയര്മാന് എം.എ. യൂസുഫലിയാണ് ഇക്കാര്യം വ്യക്തമാക്കിയത്. ജമ്മു-കശ്മീര് അഗ്രികള്ചര് പ്രൊഡക്ഷന് പ്രിന്സിപ്പല് സെക്രട്ടറി നവീന് കുമാര് ചൗധരിയുടെ നേതൃത്വത്തിലുള്ള സംഘമാണ് സന്ദര്ശനം നടത്തിയത്. ഇന്ത്യന് കോണ്സുലേറ്റിെന്റ നേതൃത്വത്തില് സംഘടിപ്പിച്ച ഭക്ഷ്യസുരക്ഷ ഉച്ചകോടിക്ക് യു.എ.ഇയില് എത്തിയതാണ് ഇവര്.പഴം, പച്ചക്കറി, പയറുവര്ഗങ്ങള്, സുഗന്ധവ്യഞ്ജനം, ഉണങ്ങിയ പഴങ്ങള് തുടങ്ങിയവയാല് സമൃദ്ധമായ ജമ്മു-കശ്മീരില് സ്ഥാപനം തുറക്കാനുള്ള തീരുമാനത്തില് സന്തോഷമുണ്ടെന്ന് യൂസുഫലി കൂട്ടിച്ചേര്ത്തു. ഇന്ത്യയില് നിന്ന് ഭക്ഷ്യ, ഭക്ഷ്യേതര ഉല്പന്നങ്ങള് ഇറക്കുമതി ചെയ്യുന്നവരില് മുന്പന്തിയില് നില്ക്കുന്ന ലുലു ഗ്രൂപ് കശ്മീരില് എത്തുന്നതോടെ ജി.സി.സി രാജ്യങ്ങളിലേക്കും മറ്റ് രാജ്യങ്ങളിലേക്കും കശ്മീരി ഉല്പന്നങ്ങള് കയറ്റുമതി ചെയ്യുന്നത് വര്ധിക്കും. നിലവില് കശ്മീരില് നിന്ന് ആപ്പിളും കുങ്കുമപ്പൂവും ഇറക്കുമതി ചെയ്യുന്നുണ്ട്. ഈ വര്ഷം നവംബര്വരെ 400 ടണ് ആപ്പിള് കശ്മീരില്നിന്ന് എത്തിച്ചു. ഇത് വരുംവര്ഷങ്ങളില് ഗണ്യമായി ഉയരും.അത്യാധുനിക ഫുഡ് പ്രോസസിങ്, പാക്കേജിങ് സെന്ററാണ് കശ്മീരില് തുറക്കുന്നത്. ഇത് യുവാക്കള്ക്ക് തൊഴിലവസരങ്ങള് സൃഷ്ടിക്കും. ജി.സി.സിയില് കശ്മീരി ആപ്പിള് ഇറക്കുമതി ചെയ്ത ആദ്യ റീട്ടെയ്ലര് ലുലുവാണെന്നും യൂസുഫലി പറഞ്ഞു. ജമ്മു-കശ്മീര് ഹോര്ട്ടികള്ചര് അഡീഷനല് സെക്രട്ടറി ജഹാംഗീര് ഹഷ്മി, കോമേഴ്സ് വിഭാഗം കോണ്സുല് നീലു റോഹ്റ, ലുലു ഡയറക്ടര് എ.വി. ആനന്ദ്, സി.ഒ.ഒ വി.ഐ. സലീം, ഡയറക്ടര് എം.എ. സലീം എന്നിവര് യോഗത്തില് പങ്കെടുത്തു.