കണ്ണൂർ വാസൂട്ടിക്ക് സംസ്‍കാര സാഹിതി നാടക പുരസ്കാരം.

തിരുവനന്തപുരം: സംസ്കാരസാഹിതി തിരുവനന്തപുരം ജില്ലാ കമ്മിറ്റിയുടെ ആഭിമുഖ്യത്തിൽ അയ്യങ്കാളി ഹാളിൽ സംഘടിപ്പിച്ച സംസ്ഥാന പ്രൊഫഷണൽ നാടകോത്സവത്തിന്റെയും സാംസ്കാരികോത്സവത്തിന്റെയും ഭാഗമായി നടന്ന ചടങ്ങിൽ മുതിർന്ന നാടകപ്രവർത്തകൻ കണ്ണൂർ വാസൂട്ടിക്ക് സംസ്കാരസാഹിതി നാടക പുരസ്കാരം മുൻമന്ത്രി വിഎസ് ശിവകുമാറും രമ്യ ഹരിദാസ് എം.എൽ.എയും ചേർന്ന് സമ്മാനിച്ചു.

നാടകം കേവലം വിനോദമല്ലെന്നും ഒരു കാലഘട്ടത്തിന്റെ ജീവിതവും സംസ്കാരവും വികാരങ്ങളും സമൂഹത്തിലേക്ക് പകർന്നുനൽകുന്ന ശക്തമായ കലാരൂപമാണെന്നും രമ്യ ഹരിദാസ് എം.എൽ.എ. പറഞ്ഞു. നാടകവേദികളെ സജീവമായി നിലനിർത്തുകയും പുതിയ തലമുറയ്ക്ക് ഈ കലാരൂപത്തെ പരിചയപ്പെടുത്തുകയും ചെയ്യേണ്ടത് സാംസ്കാരിക ഉത്തരവാദിത്വമാണെന്നും അവർ അഭിപ്രായപ്പെട്ടു.

കോഴിക്കോട്ടെ ബാല്യകാല ഓർമകളും നാടകവേദികളുമായുള്ള ബന്ധവും പങ്കുവെച്ച രമ്യ ഹരിദാസ്, മുതലക്കുളം മൈതാനം, മാനാഞ്ചിറ, ടൗൺ ഹാൾ എന്നിവിടങ്ങളിലെ നാടകാനുഭവങ്ങൾ അനുസ്മരിച്ചു. നാടകങ്ങളും നാടകഗാനങ്ങളും ഒരു കാലഘട്ടത്തിന്റെ സാംസ്കാരിക ഓർമകൾ നിലനിർത്തുന്നവയാണ്. ഒരു കഥാപാത്രത്തെ പൂർണമായി ഉൾക്കൊണ്ട് പ്രേക്ഷകരുടെ മനസ്സിലേക്ക് പകർന്നുനൽകുമ്പോൾ കലാകാരന് ലഭിക്കുന്ന മാനസിക സംതൃപ്തിക്ക് പകരംവയ്ക്കാൻ മറ്റൊന്നിനുമാകില്ലെന്നും അവർ പറഞ്ഞു. കലാകാരന്മാരുടെയും സംഘാടകരുടെയും സാങ്കേതിക പ്രവർത്തകരുടെയും കൂട്ടായ പരിശ്രമമാണ് ഓരോ നാടകാവതരണത്തിന്റെയും വിജയത്തിന് പിന്നിലെന്നും അവർ കൂട്ടിച്ചേർത്തു.

നാടകമെന്ന മഹത്തായ കലാസൃഷ്ടിയുടെ പ്രസക്തി പൂർണമായി ഉൾക്കൊണ്ട് സംസ്കാരസാഹിതി കൂടുതൽ കരുത്തോടെ മുന്നോട്ടുപോകണമെന്ന് മുൻ മന്ത്രിയും കോൺഗ്രസ് നേതാവുമായ അഡ്വ. വി. എസ്. ശിവകുമാർ പറഞ്ഞു. സംസ്ഥാന-ജില്ലാ തലങ്ങളിൽ സംഘടനയ്ക്ക് മികച്ച നേതൃത്വവും കൂട്ടായ പ്രവർത്തനശേഷിയുമുണ്ട്. ഈ നേതൃത്വത്തിന്റെ കീഴിൽ പ്രവർത്തനങ്ങൾ കൂടുതൽ മികവോടെ മുന്നോട്ടുകൊണ്ടുപോകാൻ കഴിയട്ടെയെന്നും അദ്ദേഹം ആശംസിച്ചു.

പുരസ്കാരജേതാവ് കണ്ണൂർ വാസൂട്ടി മറുപടി പ്രസംഗം നടത്തി.

ചടങ്ങിൽ അഡ്വ. കെ. മോഹൻകുമാർ, മര്യാപുരം ശ്രീകുമാർ, ഡോ. ജി.വി. ഹരി, പൂഴനാട് ഗോപൻ, ഒ.എസ്. ഗിരീഷ്, കെ.എം. ഉണ്ണികൃഷ്ണൻ, ഡോ. പ്രകാശ് പ്രഭാകർ, തുടങ്ങിയവർ പങ്കെടുത്തു.

നാടകോത്സവത്തിന്റെ ഭാഗമായി രാവിലെ വിവിധ മത്സരങ്ങളും വൈകിട്ട് കലാപരിപാടികളും നടന്നു. രാത്രി ഏഴിന് കോഴിക്കോട് രംഗഭാഷയുടെ ഒരുക്കം എന്ന നാടകവും അരങ്ങേറി.