വയനാട്ടിലേക്ക് എയർ, റെയിൽ, റോഡ് കണക്ടിവിറ്റിക്ക് യോജിച്ച പ്രവർത്തനം അനിവാര്യം
വയനാട്ടിലേക് ഹെലികോപ്റ്റർ, എയർ ആംബുലൻസ് സർവീസുകൾ ആരംഭിക്കണം, എം ഡി സി.വയനാട്ടിലേക്കുള്ള യാത്ര നിരന്തരം തടസ്സപ്പെടുന്ന സാഹചര്യത്തിൽ കേരള സർക്കാർ പരിഗണനയിലുള്ള വയനാട് ഗ്രീൻഫീൽഡ് എയർ പോർട്ട് നിർമ്മാണം ത്വരിതപ്പെടുത്തണം എന്നും സുൽത്താൻ ബത്തേരിയിലെ സർക്കാർ ഹെലിപാഡ് ഉപയോഗപ്പെടുത്തി കോഴിക്കോട്, ബാഗ്ലൂർ ഹെലികോപ്റ്റർ സർവ്വീസ് ആരംഭിക്കണമെന്നും കോഴിക്കോട് എയർപോർട്ട് ഉപദേശക സമിതി യോഗത്തിൽ മലബാർ ഡെവലപ്മെന്റ് കൗൺസിൽ പ്രസിഡന്റും എയർപോർട്ട് ഉപദേശക സമിതി അംഗവുമായ ഷെവലിയാർ സി ഇ ചാക്കുണ്ണി ആവശ്യപ്പെട്ടു.
എയർപോർട്ട് ഡയറക്ടറുടെ ചേമ്പറിൽ ഉപദേശക സമിതി ചെയർമാൻ ഇ ടി മുഹമ്മദ് ബഷീർ എം പി, എയർപോർട്ട് ഡയറക്ടറും ഉപദേശക സമിതി ജനറൽ കൺവീനറുമായ മുനീർ മാടമ്പാട്ട്, മലപ്പുറം ജില്ല കലക്ടർ വി ആർ വിനോദ് IAS എന്നിവർക്ക് ഇതുസംബന്ധിച്ച് നിവേദനം നൽകി ചർച്ച നടത്തി. വയനാട് എയർ പോർട്ടിന് പനമരത്തിടുത്തുള്ള ചീക്കല്ലൂർ എന്ന സ്ഥലത്ത് ഫീസിബിലിറ്റി സ്റ്റഡി നടത്തിയിട്ടുണ്ട്. കേന്ദ്ര സർക്കാറിൻ്റെ ഉഡാൻ പദ്ദതിയുടെ പിന്തുണയും ഇതിനുണ്ട്. ഏതാണ്ട് രണ്ട് കിലോമീറ്റർ റൺവേ കിട്ടുന്ന സ്ഥലമാണിത്. ചിരിക്കല്ലൂരിലോ അല്ലെങ്കിൽ മറ്റു അനുയോജ്യമായ സ്ഥലത്തോ എയർ പോർട്ട് സ്ഥാപിക്കാൻ വയനാട് ചേമ്പർ ഓഫ് കോമേഴ്സിന്റെ നേതൃത്വത്തിൽ മലബാർ ഡെവലപ്മെന്റ് കൗൺസിൽ മറ്റു ബന്ധപ്പെട്ട സംഘടനകൾ സംയുക്തമായി ശ്രമിച്ചു വരുന്നുണ്ട്. കരിപ്പൂർ വിമാനത്താവളമായി ബന്ധപ്പെടുത്തി വയനാട്ടിൽ ചെറു വിമാനത്താവളം നിർമ്മിച്ച് ഫീഡർ സർവീസ് ആരംഭിക്കുന്നതിന് കേന്ദ്ര-കേരള സർക്കാറുകളെ സമീപിക്കാനും യോഗം തീരുമാനിച്ചു. ചർച്ചയിൽ ഉപദേശക സമിതി അംഗങ്ങളായ ഹസൻ തിക്കോടി, ടി പി എം ഹാഷിർ അലി, അബ്ദുറഹിമാൻ രണ്ടത്താണി, എ കെ എ നസീർ എന്നിവർ പങ്കെടുത്തു. നടന്ന ഉപദേശക സമിതി യോഗത്തിൽ 2020 ഓഗസ്റ്റ് ഏഴിന് എയർ ഇന്ത്യ എക്സ്പ്രസ് അപകടം മൂലം നഷ്ടപ്പെട്ട വിമാനത്താവളത്തിന്റെ പ്രതാപം വീണ്ടെടുക്കുന്നതിനും, യാത്ര-ചരക്ക് ഇറക്കുമതി ദുരിതം ലഘൂകരിക്കുന്നതിനും വലിയ വിമാന സർവീസ് പുനരാരംഭിക്കുക, ദേശീയ -അന്തർദേശീയ വിമാന സർവീസുകൾ കൂടുതൽ ഡെസ്റ്റിനേഷനിലേക്ക് ആരംഭിക്കുക. എയർപോർട്ടിലേക്കുള്ള പൊതു ഗതാഗത സൗകര്യം വിപുലീകരിക്കുക, പ്രവേശന റോഡിലെ അനധികൃത കാർ പാർക്കിംഗ് ഒഴിവാക്കുന്നതിന് പാർക്കിംഗ് ഫീസ് ഇളവ്, ഫറോക്ക്- എയർപോർട്ട് വഴി അങ്ങാടി പുറത്തേക്ക് എലവേറ്റഡ് റെയിൽ പാത നിർമ്മിക്കുന്നതിന് റെയിൽവേ മന്ത്രാലയത്തിലും, അമിത വിമാന നിരക്ക് കുറയ്ക്കുവാൻ വിമാന കമ്പനികളിലും സമ്മർദ്ദം ചെലുത്തുക, വയനാട്ടിലേക്കുള്ള എയർ കണക്ടിവിറ്റി തുടങ്ങിയ ആവശ്യങ്ങൾ ഉന്നയിച്ചു എംപിമാരായ അബ്ദുസമദ് സമദാനി, പി പി സുനീർ എന്നിവർക്കും മറ്റു ബന്ധപ്പെട്ടവർക്കും നിവേദനം നൽകി. നിവേദനത്തിലെ ആവശ്യങ്ങൾ പരിശോധിച്ചു ഉചിതമായ നടപടികൾ സ്വീകരിക്കുമെന്ന് ഉപദേശക സമിതി ചെയർമാനും മറ്റു ബന്ധപ്പെട്ടവരും അറിയിച്ചു.
ഷെവലിയാർ സി ഇ ചാക്കുണ്ണി
9847412000
03.09.2025.