തിരുവനന്തപുരം: സംസ്ഥാനത്തിന്റെ വികസനപ്രവർത്തനങ്ങളുടെ ഗതിവേഗം വർധിപ്പിക്കാൻ സഹകരണസ്ഥാപനങ്ങളെയും സ്വകാര്യ സംരംഭകരെയും പ്രോത്സാഹിപ്പിക്കുന്ന നയമാണ് സർക്കാരിന്റേതെന്ന് സഹകരണ എക്സൈസ് വകുപ്പുമന്ത്രി എം.ലിജു പറഞ്ഞു. സഹകരണമേഖലയിലെ ആദ്യ വിമാനസർവീസ് ആരംഭിക്കുന്ന കേരള സിവിൽ ഏവിയേഷൻ ഡവലപ്മെന്റ് സഹകരണസംഘത്തിന്റെ റജിസ്ട്രേഷൻ രേഖകൾ കൈമാറി സംസാരിക്കുകയായിരുന്നു അദ്ദേഹം. സഹകരണപ്രസ്ഥാനത്തിന്റെ വിശ്വാസ്യത വീണ്ടെടുക്കാനുള്ള പ്രവർത്തനങ്ങളിൽ സംഘങ്ങൾക്ക് സർക്കാർ എല്ലാ സഹായങ്ങളും നൽകുമെന്നും മന്ത്രി വ്യക്തമാക്കി. കേരള സിവിൽ ഏവിയേഷൻ ഡവലപ്മെന്റ് സഹകരണസംഘത്തിന്റെ റജിസ്ട്രേഷൻ രേഖകൾ ചീഫ് പ്രമോട്ടർ സി.എൻ വിജയകൃഷ്ണന് മന്ത്രി കൈമാറി. സംഘത്തിന്റെ ലോഗോ പ്രകാശനം സംസ്ഥാന സഹകരണ റജിസ്ട്രാർ അനു എസ് നായർ നിർവഹിച്ചു. തമ്പാനൂർ ടെറസ് ഹോട്ടലിൽ നടന്ന ചടങ്ങിൽ സി.എൻ വിജയകൃഷ്ണൻ അധ്യക്ഷനായി. വടവന്നൂര്ട സഹകരണസംഘം പ്രസിഡന്റ് സക്കീർ ഹുസൈൻ ആദ്യ ഓഹരി സ്വീകരിച്ചു. പി.വി മോഹനൻ, ഹംസ, കരകുളം കൃഷ്ണപ്പിള്ള, എം.പി സാജു, ഡോ. പീയൂഷ് എം നമ്പൂതിരി സംസാരിച്ചു. അഡ്വ. കെ. പ്രവീൺകുമാർ എം.എൽ.എ സ്വാഗതവും വി.ബാബുരാജ് നന്ദിയും പറഞ്ഞു.