കരുതലിന്റെ ‘മധുരയാത്ര 3.0’; വിപുലമായ സൗജന്യ പ്രമേഹ അവബോധ പദ്ധതിയുമായി കിംസ് ഹെൽത്ത് കൊല്ലം
ലോക പ്രമേഹദിനത്തിൽ പൊതുജനാരോഗ്യ സേവനങ്ങൾ ജനങ്ങളിലേക്ക് നേരിട്ടെത്തിച്ച് കിംസ് ഹെൽത്ത് കൊല്ലത്തിന്റെ സഞ്ചരിക്കുന്ന ആരോഗ്യ പരിശോധനാ പദ്ധതി
കൊല്ലം , 14-11-2026: ലോക പ്രമേഹദിനത്തോടനുബന്ധിച്ച് പൊതുജനാരോഗ്യ സംരക്ഷണം ലക്ഷ്യമിട്ട് കിംസ് ഹെൽത്ത് കൊല്ലം സംഘടിപ്പിച്ച ഏകദിന സൗജന്യ പ്രമേഹ അവബോധ പദ്ധതിയായ ‘മധുരയാത്ര 3.0 – ഹൌ സ്വീറ്റ് ആർ യു?’ വിജയകരമായി സമാപിച്ചു. കഴിഞ്ഞ രണ്ട് വർഷങ്ങളായി തുടർച്ചയായി സംഘടിപ്പിച്ചു വരുന്ന പദ്ധതിയുടെ വൻ വിജയത്തിന് പിന്നാലെ, മൂന്നാം പതിപ്പായ ഇത്തവണ മുൻവർഷങ്ങളേക്കാൾ വിപുലമായ സൗകര്യങ്ങളോടും കൂടുതൽ ജനപങ്കാളിത്തത്തോടും കൂടിയാണ് പരിപാടി നടപ്പിലാക്കിയത്. കെഎസ്ആർടിസിയുമായി സഹകരിച്ച് നടത്തിയ പദ്ധതിയിലൂടെ മൂന്ന് പ്രത്യേക ബസുകളിലായി കൊല്ലം ജില്ലയിലുടനീളം പൊതുജനങ്ങൾക്ക് സൗജന്യ പ്രമേഹ പരിശോധനയും പ്രമേഹ അവബോധവും ലഭ്യമാക്കി.
കിംസ് ഹെൽത്ത് കൊല്ലം ആശുപത്രി അങ്കണത്തിൽ സംഘടിപ്പിച്ച ചടങ്ങിൽ, കിംസ് ഹെൽത്ത് കൊല്ലം സിഒഒ സിനി നായർ, മെഡിക്കൽ സൂപ്രണ്ട് ഡോ. ഹസീൻ എ എന്നിവർ ചേർന്ന് മൂന്ന് ബസുകളുടെയും ഫ്ലാഗ് ഓഫ് കർമ്മം നിർവഹിച്ചു. ഇന്റർവെൻഷണൽ കാർഡിയോളജിസ്റ്റ് ഡോ. അരുൺ ജെ ഉൾപ്പെടെയുള്ള വിദഗ്ധ ഡോക്ടർമാരും ആരോഗ്യപ്രവർത്തകരും ആശുപത്രി പ്രതിനിധികളും സഞ്ചരിക്കുന്ന ക്ലിനിക്കുകളുടെ ഭാഗമായി പൊതുജനങ്ങൾക്ക് സേവനം നൽകി. മുൻവർഷങ്ങളിൽ ലഭിച്ച മികച്ച സ്വീകാര്യതയെ തുടർന്ന് ജില്ലയിലുടെനീളം സേവനം വ്യാപിപ്പിച്ചതോടെ, നൂറു കണക്കിന് ആളുകളാണ് സൗജന്യ പരിശോധനയുടെ പ്രയോജനം നേടിയത്.
ആശുപത്രികളിൽ എത്തുന്ന രോഗികൾക്ക് ചികിത്സ നൽകുന്നതിൽ മാത്രം ഒതുങ്ങാതെ പ്രാഥമിക ആരോഗ്യപരിരക്ഷ പൊതുജനങ്ങളുടെ അരികിലേക്ക് നേരിട്ടെത്തിക്കുക എന്ന പൊതുജനാരോഗ്യ ക്ഷേമ കാഴ്ചപ്പാടിന്റെ ഭാഗമായാണ് കിംസ് ഹെൽത്ത് കൊല്ലം ഈ പദ്ധതി സംഘടിപ്പിച്ചത്. പ്രമേഹത്തെക്കുറിച്ചുള്ള ശാസ്ത്രീയ അവബോധം പൊതുജനങ്ങളിൽ വർധിപ്പിക്കുക, രോഗസാധ്യതയുള്ളവരെ നേരത്തേ കണ്ടെത്തുക, കൃത്യമായ ഇടവേളകളിലുള്ള പരിശോധനയുടെയും തുടർചികിത്സയുടെയും പ്രാധാന്യം ജനങ്ങളിലേക്ക് എത്തിക്കുക എന്നിവയായിരുന്നു പദ്ധതിയുടെ പ്രധാന ലക്ഷ്യങ്ങൾ.
പ്രമേഹം പലപ്പോഴും തുടക്കത്തിൽ പ്രകടമായ ലക്ഷണങ്ങളില്ലാതെ മുന്നേറുന്നതിനാൽ കൃത്യമായ ഇടവേളകളിലുള്ള പരിശോധനയ്ക്ക് ഏറെ പ്രാധാന്യമുണ്ട്. രോഗസാധ്യതയുള്ളവർക്ക് നേരത്തേ പരിശോധന നടത്താനും ആവശ്യമായ തുടർചികിത്സ തേടാനും ഇത്തരം സംരംഭങ്ങൾ വലിയ പ്രോത്സാഹനമാകുമെന്ന് ആശുപത്രി അധികൃതർ വ്യക്തമാക്കി.