തിരുവനന്തപുരം, 13 നവംബർ 2026:* അത്യാധുനിക ‘ഡാവിഞ്ചി എക്സ്ഐ’ റോബോട്ടിക് സർജറി സംവിധാനം ഉദ്ഘാടനം ചെയ്ത് നിർണ്ണായക ചുവടുവെപ്പുമായി കിംസ് ഹെൽത്ത്. സംഗീത സംവിധായകനും ഗായകനുമായ ഷാൻ റഹ്മാൻ ഉദ്ഘാടനകർമ്മം നിർവ്വഹിച്ചു. കിംസ് ഹെൽത്ത് ഗ്രൂപ്പ് ചെയർമാനും മാനേജിംഗ് ഡയറക്ടറുമായ ഡോ. എം. ഐ. സഹദുള്ള ചടങ്ങിൽ അധ്യക്ഷത വഹിച്ചു. ആസ്റ്റർ ഡി.എം. ക്വാളിറ്റി കെയർ ഇന്ത്യ 3 ക്ലസ്റ്റർ സിഇഒ വിശാൽ മഹേശ്വരി മുഖ്യപ്രഭാഷണം നടത്തി.
ചെറിയ മുറിവുകളിലൂടെ അതിസൂക്ഷ്മവും സങ്കീർണ്ണവുമായ ശസ്ത്രക്രിയകൾ കൂടുതൽ കൃത്യതയോടെ ചെയ്യാൻ ഡോക്ടർമാരെ സഹായിക്കുന്ന ‘മിനിമലി ഇൻവേസീവ്’ (കീഹോൾ) ശസ്ത്രക്രിയാ രീതിയാണ് റോബോട്ടിക് സർജറി. റോബോട്ടിക് സാങ്കേതികവിദ്യയും ശസ്ത്രക്രിയാ വിദഗ്ധന്റെ വൈദഗ്ധ്യവും ഒത്തുചേരുന്നതിലൂടെ വേദന, രക്തനഷ്ട്ടം, അണുബാധയ്ക്കുള്ള സാധ്യത, ആശുപത്രിവാസം എന്നിവ കുറയ്ക്കുക, വളരെ ചെറിയ മുറിവുകൾ, വേഗത്തിൽ സുഖം പ്രാപിക്കുക പോലുള്ളവയും രോഗികൾക്ക് ഈ സംവിധാനം വഴി സാധ്യമാകുന്നു. യൂറോളജി, ഗൈനക്കോളജി, സർജിക്കൽ ഗ്യാസ്ട്രോഎൻട്രോളജി, കാർഡിയോതൊറാസിക് സർജറി, സർജിക്കൽ ഓങ്കോളജി, ജനറൽ സർജറി, ഇ.എൻ.ടി തുടങ്ങി വിവിധ വിഭാഗങ്ങളിലെ ചികിത്സകൾക്ക് ഈ സാങ്കേതികവിദ്യ പ്രയോജനപ്പെടും.
“ആധുനിക ആരോഗ്യപരിപാലന രംഗത്ത് റോബോട്ടിക് ശസ്ത്രക്രിയ പുതിയ സാധ്യതകൾ തുറന്നുനൽകുന്നു. ലോകോത്തര നിലവാരമുള്ള ശസ്ത്രക്രിയാ സൗകര്യങ്ങളും ഏറ്റവും പുതിയ ചികിത്സാ രീതികളും രോഗികൾക്ക് ലഭ്യമാക്കുന്നതിനുള്ള കിംസ് ഹെൽത്തിന്റെ പ്രതിബദ്ധതയാണ് ഈ നൂതന സാങ്കേതികവിദ്യയിലൂടെ പ്രതിഫലിക്കുന്നത്. ഇതുവരെ 100 റോബോട്ടിക് ശസ്ത്രക്രിയകൾ പൂർത്തിയാക്കാൻ കിംസ് ഹെൽത്തിന് സാധിച്ചിട്ടുണ്ട്.” അധ്യക്ഷ പ്രസംഗത്തിൽ കിംസ് ഹെൽത്ത് ഗ്രൂപ്പ് ചെയർമാനും മാനേജിംഗ് ഡയറക്ടറുമായ ഡോ. സഹദുള്ള പറഞ്ഞു.
“ജീവിതത്തിന്റെ എല്ലാ മേഖലകളെയും സാങ്കേതികവിദ്യ വൻമാറ്റങ്ങൾ സൃഷ്ടിച്ചുകൊണ്ടിരിക്കുന്ന ഒരു കാലഘട്ടത്തിലാണ് നാം ജീവിക്കുന്നത്. നൂതന ആശയങ്ങളെ സ്വീകരിക്കുന്നതിനും, അത്യാധുനിക ശസ്ത്രക്രിയാ സാങ്കേതികവിദ്യയുടെ നേട്ടങ്ങൾ രോഗികളിലേക്ക് എത്തിക്കുന്നതിനുമുള്ള തങ്ങളുടെ പ്രതിബദ്ധത വെളിപ്പെടുത്തുന്ന ‘ഡാ വിഞ്ചി റോബോട്ടിക് സർജറി സംവിധാനം’ അവതരിപ്പിച്ചതിന് കിംസ് ഹെൽത്ത് ഏറെ അഭിനന്ദനം അർഹിക്കുന്നു.” ഉദ്ഘാടന പ്രസംഗത്തിൽ ഷാൻ റഹ്മാൻ പറഞ്ഞു.
“ആരോഗ്യമേഖലയ്ക്ക് എപ്പോഴും പരിചരണവും അനുകമ്പയുമാണ് ആവശ്യമാണ്. വെറും നാല് മാസത്തിനുള്ളിൽ 100 റോബോട്ടിക് ശസ്ത്രക്രിയകൾ വിജയകരമായി പൂർത്തിയാക്കിയത് മെഡിക്കൽ സംഘത്തെ സംബന്ധിച്ചിടത്തോളം ഏറെ അഭിമാനാർഹമായ കാര്യമാണ്. 39 ആശുപത്രികളുടെ ശൃംഖലയിലുടനീളം 10 ഡാവിഞ്ചി റോബോട്ടുകളും അതിൽ ആറെണ്ണം നൂതന എക്സ്ഐ മോഡലുകളുമാണ്.” ആസ്റ്റർ ഡി.എം. ക്വാളിറ്റി കെയർ ഇന്ത്യ 3 ക്ലസ്റ്റർ സിഇഒ വിശാൽ മഹേശ്വരി പറഞ്ഞു.
കിംസ്ഹെൽത്ത് യൂറോളജി വിഭാഗം സീനിയർ കൺസൾട്ടന്റും കോ-ഓർഡിനേറ്ററുമായ ഡോ. റെനു തോമസ് സ്വാഗതം ആശംസിച്ചു. കിംസ്ഹെൽത്ത് യൂറോ-ഓൺകോളജി ആൻഡ് റോബോട്ടിക് സർജൻ ഡോ. നസറെത്ത് സോളമൻ ‘ഡാവിഞ്ചി എക്സ്ഐ’ റോബോട്ടിക് സർജറി സംവിധാനത്തെക്കുറിച്ച് വിശദീകരിച്ചു. കിംസ്ഹെൽത്ത് ട്രാൻപ്ലാന്റ് സർവീസസ് ഡയറക്ടറും ഹെപ്പറ്റോബിലിയറി പാൻക്രിയാറ്റിക് ആൻഡ് ലിവർ ട്രാൻസ്‌പ്ലാന്റ് സർജറി വിഭാഗം സീനിയർ കൺസൾട്ടന്റുമായ ഡോ. ഷബീർ അലി ടി യു നന്ദി രേഖപ്പെടുത്തി.