ടി.എം.സി. വിഷന്‍ ഡോക്യുമെന്‍റിന്‍റെ അടിസ്ഥാനത്തില്‍ വികസന പരിപാടി തയ്യാറാക്കും: മന്ത്രി സി.പി. ജോണ്‍*

ടി.എം.സി. വിഷന്‍ ഡോക്യുമെന്‍റിന്‍റെ അടിസ്ഥാനത്തില്‍ വികസന പരിപാടി തയ്യാറാക്കും: മന്ത്രി സി.പി. ജോണ്‍*

ആരോഗ്യ രംഗത്തെ മുന്നേറ്റത്തിനായി ‘ടി.എം.സി വിഷൻ 2030’*

*തിരുവനന്തപുരം മെഡിക്കൽ കോളേജ് പ്ലാറ്റിനം ജൂബിലി കൺവെൻഷന് തുടക്കം*

തിരുവനന്തപുരം: തിരുവനന്തപുരം മെഡിക്കൽ കോളേജിന്‍റെ  പ്ലാറ്റിനം ജൂബിലി കൺവെൻഷനിലെ വിഷന്‍ ഡോക്യുമെന്‍റിന്‍റെ അടിസ്ഥാനത്തില്‍ വികസന പരിപാടി തയ്യാറാക്കുമെന്ന് ഗതാഗത വകുപ്പ് മന്ത്രി സി.പി. ജോണ്‍. മെഡിക്കല്‍ കോളേജ് ഓട്ടോണമസ് ആക്കുന്നതിനെക്കുറിച്ച് ചര്‍ച്ച ചെയ്യേണ്ടതാണ്. മികച്ച പ്രവര്‍ത്തനങ്ങളിലൂടെ ഇന്ത്യയിലെ മികച്ച മെഡിക്കല്‍ കോളേജുകളില്‍ ഒന്നായി തിരുവനന്തപുരം മെഡിക്കല്‍ കോളേജിനെ മാറ്റാന്‍ സാധിക്കും. 75 വര്‍ഷക്കാലത്തെ ശോഭനമായ ചരിത്രമാണ് തിരുവനന്തപുരം മെഡിക്കല്‍ കോളേജിനുള്ളത്. വികസനത്തിന്‍റെ അടുത്ത കുതിപ്പിലേക്ക് മെഡിക്കല്‍ കോളേജിനെ എത്തിക്കുമെന്നും മന്ത്രി പറ‍ഞ്ഞു. തിരുവനന്തപുരം മെഡിക്കൽ കോളേജിന്‍റെ പ്ലാറ്റിനം ജൂബിലി കൺവെൻഷൻ 2026ലെ ‘ടി.എം.സി വിഷൻ 2030’ സെമിനാർ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി.

മെഡിക്കല്‍ വിദ്യാഭ്യാസം, രോഗീ പരിചരണം, ഗവേഷണം, ഇന്നവേഷന്‍ തുടങ്ങിയവയില്‍ ഊന്നിയായിരിക്കണം വിഷന്‍ ഡോക്യുമെന്‍റ് തയ്യാറാക്കേണ്ടതെന്ന് ചടങ്ങില്‍ അധ്യക്ഷത വഹിച്ച ‌വി. മുരളീധരൻ എം.എൽ.എ. പറഞ്ഞു. ആരോഗ്യ സർവകലാശാല വൈസ് ചാൻസലർ ഡോ. മോഹനൻ കുന്നുമ്മൽ, ആരോഗ്യ വകുപ്പ് ഡയറക്ടര്‍ ഡോ. വി. മീനാക്ഷി എന്നിവര്‍ വിശിഷ്ടാതിഥികളായി.

ടി.എം.സി.എ.എ. മുൻ പ്രസിഡന്‍റും കിംസ് ഹെൽത്ത് ചെയർമാനുമായ ഡോ. എം.ഐ. സഹദുള്ള  മുഖ്യ പ്രഭാഷണം നടത്തി. അലുമ്നി അസോസിയേഷന്‍ പ്രസിഡന്‍റ് ഡോ. സി. ജോണ്‍ പണിക്കര്‍, മെഡിക്കല്‍ കോളേജ് പ്രിന്‍സിപ്പല്‍ ‍ഡോ. രഞ്ജു രവീന്ദ്രന്‍, പ്ലാനിംഗ് ബോര്‍ഡ് അംഗം ഡോ. എസ്.എസ്. ലാല്‍, അലുമ്നി അസോസിയേഷന്‍  വൈസ് പ്രസിഡന്‍റ് ഡോ. ദിനേശ് കെ., അലുമ്നി അസോസിയേഷന്‍ സെക്രട്ടറി ഡോ. കവിത രവി, ചേംബര്‍ ഓഫ് കൊമേഴ്സ് പ്രസിഡന്‍റ്  രഘു ചന്ദ്രന്‍ നായര്‍ എന്നിവര്‍ പങ്കെടുത്തു.

ഡോ. രഞ്ജിത്ത്, ഡോ. രമേഷ് രാജന്‍, ഡോ. പ്രേമ എന്‍.എസ്., ഡോ. ബിനോയ് എസ്., ഡോ. ഉമ, ഡോ. സുചിത്ര, ഡോ. അരവിന്ദ്, ഡോ. പ്രണവ്, ഡോ. നവ്യശ്രീ, അഫ്ന എന്നിവര്‍ വിവിധ വിഷയങ്ങളില്‍ സംസാരിച്ചു.

തിരുവനന്തപുരം മെഡിക്കൽ കോളേജിലെ ഡയമണ്ട് ജൂബിലി ഓഡിറ്റോറിയത്തിൽ നവംബർ 20 മുതൽ 22 വരെയാണ് കൺവെൻഷൻ സംഘടിപ്പിക്കുന്നത്. തിരുവനന്തപുരം മെഡിക്കൽ കോളേജ് അലുമ്നി അസോസിയേഷൻ (TMCAA), ടീച്ചേഴ്സ് അസോസിയേഷന്‍, സ്റ്റുഡന്‍സ് യൂണിയന്‍ എന്നിവര്‍ സംയുക്തമായാണ് പരിപാടി സംഘടിപ്പിക്കുന്നത്.

തിരുവനന്തപുരം മെഡിക്കൽ കോളേജിന്റെ പൈതൃകം എന്ന വിഷയത്തിൽ ഡോ. കെ. രാജശേഖരൻ നായരും, ഭാവിക്കായുള്ള ധനസമാഹരണത്തിൽ അലുമ്നിയുടെ പങ്ക് എന്ന വിഷയത്തിൽ ഡോ. കൃഷ്ണ ആർ. പ്രസാദും പ്രഭാഷണങ്ങൾ നടത്തി.

മെഡിക്കൽ വിദ്യാഭ്യാസം, ആരോഗ്യ രംഗത്തെ വികസനം, ഭാവി ചികിത്സാ സംവിധാനങ്ങൾ തുടങ്ങിയ വിഷയങ്ങളിൽ വിവിധ വിഭാഗങ്ങളിലെ വിദഗ്ധർ പ്രബന്ധങ്ങൾ അവതരിപ്പിച്ചു. ഇന്ത്യയിലെ കാൻസർ ചികിത്സയിൽ പ്രോട്ടോൺ തെറാപ്പിയുടെ ഏഴുവർഷത്തെ മുന്നേറ്റം എന്ന വിഷയത്തിൽ അപ്പോളോ ഹോസ്പിറ്റൽസ് ഇന്ത്യ ഗ്രൂപ്പ് ചീഫ് ബിസിനസ് ഓഫീസർ ജോൺ ചാണ്ടിയും, ഹൃദ്രോഗ ചികിത്സയിലെ ഉചിതവും അനുചിതവുമായ രീതികൾ എന്ന വിഷയത്തിൽ അമേരിക്കയിലെ ലൂയിസ് സ്റ്റോക്സ് ക്ലീവ്‌ലൻഡ് വി.എ. മെഡിക്കൽ സെന്ററിലെ കാർഡിയോളജി വിഭാഗം മേധാവി ഡോ. മുഹമ്മദ് നജീബ് ഒസ്മാനും പ്രഭാഷണങ്ങൾ നടത്തി. അവാർഡ് ദാനച്ചടങ്ങും കലാസന്ധ്യയും ഇതോടൊപ്പം നടന്നു.

Comments (0)
Add Comment