സംസ്ഥാനത്തെ ബാങ്കുകളുടെ മൊത്തം ബിസിനസ് : കേരള ബാങ്ക് നാലാം സ്ഥാനത്ത്

കേരളത്തിലെ ബാങ്കുകളുടെ മൊത്തം ബിസിനസിന്റെ കണക്കെടുത്താൽ  നാലാം സ്ഥാനത്താണ് കേരള ബാങ്ക്. 2026 ജൂൺ മാസത്തിലെ SLBC കണക്കുപ്രകാരം മുൻപ് അഞ്ചാം സ്ഥാനത്തായിരുന്ന കേരള ബാങ്ക് ഇപ്പോൾ നാലാം സ്ഥാനത്ത് എത്തി.
കേരള ബാങ്കിന്റെ മൊത്തം ബിസിനസ് 31.03.2026-ൽ 1,28,697 കോടി രൂപയായി വർദ്ധിച്ചു. കേരള ബാങ്ക് രൂപീകരണത്തിനുശേഷം ഏറ്റവും കൂടുതൽ ബിസിനസ് വളർച്ചയായ 7700 കോടി നേടിയത് 2025-26 വർഷത്തിലാണ്. കേരളത്തിലെ മൊത്തം ബാങ്കിംഗ് ബിസിനസിന്റെ 7 ശതമാനം മാർക്കറ്റ് ഷെയർ കേരള ബാങ്കിനുണ്ട്.
കേരള ബാങ്കിൽ ഇന്റർനെറ്റ് ബാങ്കിംഗ് സേവനങ്ങൾ യാഥാർത്ഥ്യമായതോടുകൂടി കേരളത്തിലെ സഹകരണ മേഖല വൻമാറ്റത്തിന് സാക്ഷ്യം വഹിക്കാൻ പോവുകയാണ്. ഇന്റർനെറ്റ് ബാങ്കിംഗ്, Merchant Acquisition (QR Code) എന്നീ സേവനങ്ങളുടെ ഉദ്ഘാടനം ബഹു. സഹകരണ-എക്സൈസ് മന്ത്രി ശ്രീ.എം.ലിജു സെപ്റ്റംബർ 22-ന് എറണാകുളം അങ്കമാലി കറുകുറ്റിയിലെ അഡ്‍ലക്സ് കൺവെൻഷൻ സെന്റർ ഹാളിൽ നിർവഹിക്കുന്നതാണ്. തുടർന്ന്, ബാങ്കിന്റെ വാർഷിക പൊതുയോഗം നടക്കുന്നതാണ്.
ബാങ്കിന്റെ എല്ലാ ഇടപാടുകാർക്കും, വിശിഷ്യാ പ്രാഥമിക കാർഷിക വായ്പാ സഹകരണ സംഘങ്ങൾ (PACS) ഉൾപ്പെടെയുള്ള എല്ലാ സഹകരണ സ്ഥാപനങ്ങൾക്കും, ഈ സൗകര്യങ്ങൾ ലഭ്യമാക്കുന്നതിന് ബാങ്ക് സജ്ജമായിക്കഴിഞ്ഞു.
ബാങ്ക് ശാഖയിൽ നേരിട്ട് പോകാതെ തന്നെ, കമ്പ്യൂട്ടർ, മൊബൈൽ ഫോൺ തുടങ്ങിയ ഉപകരണങ്ങൾ ഉപയോഗിച്ച് ഇന്റർനെറ്റിലൂടെ ബാങ്കിംഗ് സേവനങ്ങൾ ലഭ്യമാക്കുന്ന സംവിധാനമാണ് Internet Banking. വീട്ടിലോ ഓഫീസിലോ ഇരുന്നുകൊണ്ട് തന്നെ അക്കൗണ്ട് ബാലൻസ് പരിശോധിക്കാനും, പണം ട്രാൻസ്ഫർ ചെയ്യാനും, ബില്ലുകൾ അടയ്ക്കാനും, സ്റ്റേറ്റ്മെന്റുകൾ ഡൗൺലോഡ് ചെയ്യാനും, ഫിക്സഡ് ഡെപ്പോസിറ്റ് ഉൾപ്പെടെയുള്ള നിക്ഷേപങ്ങൾ ആരംഭിക്കാനും ഇത് സഹായിക്കുന്നു. ചുരുക്കിപ്പറഞ്ഞാൽ, ബാങ്ക് ശാഖ തന്നെ ഇടപാടുകാരന്റെ വിരൽത്തുമ്പിൽ എത്തിക്കുന്ന സൗകര്യമാണ് Internet Banking.
സ്ഥാപനങ്ങൾ, വ്യാപാരികൾ എന്നിവർക്ക് ഉപഭോക്താക്കളിൽ നിന്ന് പണമായി അല്ലാതെ, മൊബൈൽ ഫോൺ ഉപയോഗിച്ച് QR കോഡ് സ്കാൻ ചെയ്ത് ഡിജിറ്റലായി പണം സ്വീകരിക്കാൻ സാധിക്കുന്ന സംവിധാനമാണ് Merchant Acquisition. ഇതിനായി ബാങ്ക് വ്യാപാരികൾക്ക് അവരുടേതായ QR Code നൽകുന്നു. ഈ QR Code, കടയിലോ സ്ഥാപനത്തിലോ പ്രദർശിപ്പിക്കുകയും, ഉപഭോക്താവ് തന്റെ മൊബൈൽ ബാങ്കിംഗ് അല്ലെങ്കിൽ UPI ആപ്പ് ഉപയോഗിച്ച് അത് സ്കാൻ ചെയ്ത് പണം അടയ്ക്കുകയും ചെയ്യുന്നു. ഈ തുക നേരിട്ട് വ്യാപാരിയുടെ കേരള ബാങ്ക് അക്കൗണ്ടിലേക്ക് എത്തുന്നു. ക്യാഷ് കൈകാര്യം ചെയ്യുന്നതിന്റെ ബുദ്ധിമുട്ടുകളും അപകടസാധ്യതകളും ഒഴിവാക്കി, സുരക്ഷിതവും വേഗതയേറിയതുമായ ഇടപാടുകൾ സാധ്യമാക്കുന്ന സൗകര്യമാണിത്.
Internet Banking മുഖേന ലഭ്യമാകുന്ന നേട്ടങ്ങൾ
1.IMPS, NEFT, RTGS സംവിധാനങ്ങൾ ഉപയോഗിച്ച് പണം അയക്കുന്നതിനുള്ള സൗകര്യം.
2.ഒന്നിലേറെ അക്കൗണ്ടുകളിലേക്ക് ഒറ്റ ഇടപാടിൽ പണം അയക്കുന്നതിനുള്ള Bulk Fund ട്രാൻസ്ഫർ സൗകര്യം.
3.സ്വന്തം അക്കൗണ്ടുകൾ തമ്മിൽ പണം കൈമാറ്റം നടത്തുന്നതിനുള്ള സൗകര്യം.
4.കേരള ബാങ്കിലെ അനുവദിക്കപ്പെട്ട മറ്റേതൊരു അക്കൗണ്ടിലേക്കും പണം കൈമാറ്റം ചെയ്യുന്നതിനുള്ള സൗകര്യം.
5.KSEB, വാട്ടർ അതോറിറ്റി ഉൾപ്പെടെയുള്ള ബില്ലുകൾ അടയ്ക്കുന്നതിനും ഫോൺ, DTH റീചാർജ് ചെയ്യുന്നതിനുമുൾപ്പെടെയുള്ള ഓൺലൈൻ സൗകര്യങ്ങൾ.
6.അക്കൗണ്ട് ബാലൻസ് അറിയുന്നതിനും, മിനി സ്റ്റേറ്റ്‌മെന്റ്, വിശദമായ അക്കൗണ്ട് സ്റ്റേറ്റ്‌മെന്റ് ഡൗൺലോഡ് ചെയ്യുന്നതിനും ഇ.മെയിൽ ആയി ലഭിക്കുന്നതിനുമുള്ള സൗകര്യങ്ങൾ.
7.പുതിയ ഫിക്സഡ് ഡെപ്പോസിറ്റ് ആരംഭിക്കുന്നതിനും, നിലവിലെ ഫിക്സഡ് ഡെപ്പോസിറ്റ്, ലോണുകൾ എന്നിവയുടെ വിശദാംശങ്ങൾ അറിയുന്നതിനുമുളള സൗകര്യം.
8.പോസിറ്റീവ് പേയ്മെന്റ്, ചെക്ക് ബുക്കിന് അപേക്ഷിക്കുന്നതിനും, ഇടപാടുകൾ നിയന്ത്രിക്കുന്നതിനുമുള്ള സൗകര്യം.
9.ബെനഫിഷ്യറി മാനേജ്മെന്റിനും ഇടപാടുകളുടെ പരിധി നിയന്ത്രിക്കുന്നതിനുമുള്ള സൗകര്യം.
10.സ്ഥാപനങ്ങളുടെ സ്വഭാവം, ആവശ്യം എന്നിവ അനുസരിച്ച് മേക്കർ, ചെക്കർ ഓതറൈസർ നിലകളിൽ അംഗീകരിക്കൽ ആവശ്യമായ പണമിടപാട് നടപടിക്രമങ്ങൾ.
11.User Name, Password, OTP തുടങ്ങിയവ ഉപയോഗപ്പെടുത്തിയുള്ള ത്രിതല സുരക്ഷാ സംവിധാനം.
12.ഒന്നിലേറെ ബ്രാഞ്ചുകളുള്ള സ്ഥാപനങ്ങൾക്ക് വ്യത്യസ്ത ബ്രാഞ്ചുകളിൽ നിന്നും ആവശ്യാനുസരണം പ്രവർത്തിപ്പിക്കാവുന്ന സൗകര്യം.
13.ഇംഗ്ലീഷ്, മലയാളം, തമിഴ്, ബംഗാളി, കന്നഡ ഭാഷകളിൽ ഉപയോഗിക്കാനുള്ള സൗകര്യം.
14.വ്യക്തിഗത ഉപഭോക്താക്കൾക്ക് ATM കാർഡ് മാനേജ് ചെയ്യുന്നതിനുളള സൗകര്യം.

15. ബാങ്കിംഗ് സേവനങ്ങൾ 24 x 7 ലഭ്യമാകുന്നു.

Merchant Acquisition (QR Code) മുഖേന ലഭ്യമാകുന്ന നേട്ടങ്ങൾ
1.ചെറുകിട വ്യാപാരികൾക്കും, സ്ഥാപനങ്ങൾക്കും ക്യാഷ്‌ലെസ് ഇടപാടുകൾ എളുപ്പത്തിൽ സ്വീകരിക്കാൻ സാധിക്കുന്നു.
2.പണമിടപാടുകൾ സ്വയമേവ ബാങ്ക് അക്കൗണ്ടിൽ രേഖപ്പെടുത്തുന്നതിനാൽ കണക്കുകൾ സൂക്ഷിക്കൽ എളുപ്പമാകുന്നു.
3.കള്ളനോട്ട്, ചില്ലറ ക്ഷാമം തുടങ്ങിയ പ്രശ്നങ്ങൾ ഒഴിവാകുന്നു.
4.സഹകരണ സ്ഥാപനങ്ങൾക്ക് QR അധിഷ്ഠിത പണം സ്വീകരണം ആരംഭിക്കാൻ അവസരം ലഭിക്കുന്നു.
5.ഉപഭോക്താക്കൾക്ക് സുരക്ഷിതവും വേഗതയേറിയതുമായ പേയ്മെന്റ് അനുഭവം ലഭിക്കുന്നു.
6.സേവനങ്ങൾ 24 x 7 ലഭ്യമാകുന്നു.
Internet Banking, Merchant Acquisition (QR Code) എന്നീ രണ്ട് നൂതന സേവനങ്ങളും കേരള ബാങ്കിന്റെ ഡിജിറ്റൽ പരിവർത്തന യാത്രയിലെ സുപ്രധാന നാഴികക്കല്ലുകളാണ്. സംസ്ഥാനത്തെ സഹകരണ മേഖലയെ കൂടുതൽ ശക്തവും ആധുനികമാക്കുന്നതിനും, പ്രാഥമിക സഹകരണ സംഘങ്ങൾ ഉൾപ്പെടെയുള്ള എല്ലാ ഇടപാടുകാർക്കും മികച്ച സേവനം ലഭ്യമാക്കുന്നതിനും ഈ സൗകര്യങ്ങൾ സഹായകമാകും.

പത്രസമ്മേളനത്തിൽ പങ്കെടുക്കുന്നവർ
ശ്രീ.പി.മോഹനൻ മാസ്റ്റർ, പ്രസിഡന്റ്, കേരള ബാങ്ക്.
ശ്രീ.ടി.വി.രാജേഷ്, വൈസ് പ്രസിഡന്റ്, കേരള ബാങ്ക്.
ശ്രീ.ജോർട്ടി.എം.ചാക്കോ, ചീഫ് എക്സിക്യൂട്ടീവ് ഓഫീസർ, കേരള ബാങ്ക്.
ശ്രീ.റോയ് എബ്രഹാം, എക്സിക്യൂട്ടീവ് ഡയറക്ടർ, കേരള ബാങ്ക്.
ശ്രീ.എ.ആർ.രാജേഷ്, ചീഫ് ജനറൽ മാനേജർ, കേരള ബാങ്ക്.
ശ്രീ.എ.അനിൽ കുമാർ, ചീഫ് ജനറൽ മാനേജർ, കേരള ബാങ്ക്.
ശ്രീ.ടി.കെ.റോയ്, ചീഫ് ജനറൽ മാനേജർ, കേരള ബാങ്ക്.