മെയ് 30 ശനിയാഴ്ച തലസ്ഥാന നഗരം കോരിച്ചൊരിയുന്ന മഴയത്ത് മുങ്ങി അമർന്നപ്പോൾ, തൈക്കാട് PWD റസ്റ്റ് ഹൗസ് ഓഡിറ്റോറിയ൦ ഒരു മഹാ സാംസ്കാരിക സമുച്ചയത്തിന് സാക്ഷിയാവുകയായിരുന്നു. ട്രിവാൻഡ്രം കൾച്ചറൽ സമ്മിറ്റ് എന്ന ഈ സാംസ്കാരിക ഉച്ചകോടി, തനിമ കലാ സാഹിത്യ വേദിയുടെ തിരുവനന്തപുരത്തെ ഏറ്റവും ഉജ്ജ്വലമായ പരിപാടിയായി മാറുകയായിരുന്നു എന്ന് നിസ്സംശയം പറയാം. സംഘാടനത്തിന്റെ മികവുകൊണ്ടും പരിപാടികളുടെ വൈവിധ്യം കൊണ്ടും വേറിട്ട ഒരു അനുഭവമായി മാറി ഈ പരിപാടി.
എൻറെ പരിപാടിയായ Interactive Session ഉച്ചയ്ക്ക് ശേഷമായിരുന്നു. അതുകൊണ്ട് ഞാൻ ഉച്ചയോടെയാണ് എറണാകുളത്തു നിന്നും തിരുവനന്തപുരത്ത് എത്തിയത്. അതുകൊണ്ടുതന്നെ രാവിലത്തെ ഉദ്ഘാടന സെഷനിൽ പങ്കെടുക്കാൻ എനിക്ക് കഴിഞ്ഞില്ല. നിറഞ്ഞു കവിഞ്ഞ സദസ്സിന്റെയും തിരുവന്തപുരത്തെ സാംസ്കാരിക പ്രതിഭകളുടെ നിറസാന്നിധ്യം കൊണ്ട് ധന്യമായ വേദിയുടെയും ചിത്രങ്ങൾ കണ്ടപ്പോൾ ആ പരിപാടി നഷ്ടമായതിൽ കുറ്റബോധം തോന്നി. മാത്രമല്ല വേദിയിൽ ഉപവിഷ്ടരായ പല സാംസ്കാരിക പ്രതിഭകളും എൻറെ മുൻകാല സുഹൃത്തുക്കൾ കൂടിയായിരുന്നു. പ്രത്യേകിച്ച് എം മെഹബൂബ്, കെ വി മോഹൻകുമാർ, കാര്യവട്ടം ശ്രീകണ്ഠൻ നായർ തുടങ്ങിയവർ. അവരെ കാണാനുള്ള അവസരം നഷ്ടപ്പെട്ടതിലും വിഷമം തോന്നി.
തുടർന്ന് നടന്നത് സ്റ്റേജിനെ പ്രകമ്പനം കൊള്ളിച്ച സാംസ്കാരിക പരിപാടികളുടെ വേലിയേറ്റം ആയിരുന്നു. കാവ്യ വസന്തം, കഥയിടം എന്നീ പരിപാടികളും അതിഗംഭീരം ആയിരുന്നു. തനിമയുടെ സ്വന്തം കഥാകാരൻ സലിം കുരുക്കളകത്ത് തന്റെ ആശയങ്ങൾ അവതരിപ്പിച്ചു കൊണ്ടിരിക്കുമ്പോഴാണ് ഞാൻ അവിടെ എത്തിയത് . തിങ്ങി നിറഞ്ഞ സദസ്സ് ആയിരുന്നു മേൽപ്പറഞ്ഞ രണ്ട് സാഹിത്യവേദികൾക്കും സാക്ഷിയായത്.
ചിത്രകാരന്മാരുടെ സംഗമവും ലൈവ് കാരിക്കേച്ചർ ഷോയും സജീവമായി. വാഴമുട്ടം ചന്ദ്രബാബുവിന്റെ നേതൃത്വത്തിൽ അരങ്ങേറിയ പാട്ടാഴി എന്ന സംഗീത പരിപാടിയും ഗാനങ്ങളുടെ അവതരണം കൊണ്ടും സംഗീതത്തെ സംബന്ധിച്ചുള്ള വിവരണങ്ങൾ കൊണ്ടും വളരെ ശ്രദ്ധേയമായി.
രുചിയുടെ സംസ്കാരത്തെക്കുറിച്ച് തനിമയുടെ സ്വന്തം ട്രാവൽ ബ്ലോഗർ ആയ അഷ്കർ കബീറിന്റെ പ്രഭാഷണം പുതിയ അറിവുകൾ പകർന്നു തരുന്നതായിരുന്നു.
ഞാനുമായുള്ള ഒരു ലഘു ഇന്റർ ആക്ടീവ് സെഷനു ശേഷം എല്ലാവരും പ്രതീക്ഷയോടെ കാത്തിരുന്ന നാഗൂർ നാദം എന്ന തനിമയുടെ സ്വന്തം ബാൻറ് ഗ്രൂപ്പിൻറെ ഗംഭീര സംഗീത വിസ്ഫോടനം ആയിരുന്നു നടന്നത്.
അത്യന്തം വിജയകരമായിരുന്ന ഈ പരിപാടിയുടെ സൂത്രധാരൻ ജില്ലാ പ്രസിഡൻറ് അമീർ കണ്ടൽ ആയിരുന്നു. ഉദ്ഘാടന സെഷനിൽ മാത്രമാണ് അദ്ദേഹം സ്റ്റേജിൽ ഇരുന്നത്. മറ്റെല്ലാ സെഷനുകളും കൈകാര്യം ചെയ്യാനായി അതതു വിഷയത്തിൽ പ്രഗൽഭ്യമുള്ള തനിമ പ്രവർത്തകരെയാണ് അദ്ദേഹം നിയോഗിച്ചത് .എന്നാൽ അദ്ദേഹത്തിൻറെ നിശബ്ദ സാന്നിധ്യവു൦ സംഘാടക മികവും ഓരോ നിമിഷവും വേദിയിലും സദസ്സിലും പ്രകടമായി കൊണ്ടിരുന്നു.
തനിമ കലാസാഹിത്യവേദിയുടെ തിരുവനന്തപുരം ജില്ലാ സമിതി ഈ കൾച്ചറൽ സമ്മിറ്റോടുകൂടി ഒരു മാസ് എൻട്രി ആണ് നടത്തിയിരിക്കുന്നത് . അമീർ കണ്ടലിനും തിരുവനന്തപുരം ജില്ലയിലെ എല്ലാ തനിമ പ്രവർത്തകർക്കും ഹൃദയം നിറഞ്ഞ അഭിനന്ദനങ്ങൾ!
ആദം അയൂബ്
സംസ്ഥാന പ്രസിഡൻറ്