ശരീരഭാരം കുറയ്ക്കാനും ബോഡി ഫിറ്റാക്കാനും എളുപ്പവഴി തേടുന്നവർ ഏറെയാണ്. എന്നാൽ, അതിലൊരുപാട് പേർ ആദ്യം ചെയ്യുന്നത്, പ്രഭാതഭക്ഷണം ഒഴിവാക്കുക എന്നതാണ്.
രാവിലെ ഭക്ഷണം ഒഴിവാക്കുമ്പോൾ “കുറച്ച് പണിയും കുറയും, ശരീരവും ലൈറ്റാകും” എന്നൊരു ധാരണ പലർക്കും ഉണ്ടാകും. പക്ഷെ ഇതൊക്കെ ശരിയായ മാർഗമാണോ?
ചിലർക്കു പ്രഭാതഭക്ഷണം ഒഴിവാക്കുന്നത് താൽക്കാലികമായി ഭാരം കുറയ്ക്കാൻ സഹായിക്കാം. പക്ഷേ, ദീർഘകാലത്ത് അത് ആരോഗ്യത്തിന് തിരിച്ചടിയാകും. ആദ്യം തന്നെ രക്തത്തിലെ പഞ്ചസാരയുടെ അളവിൽ മാറ്റം ഉണ്ടാകും. അതിലൂടെ തളർച്ച, ക്ഷീണം, പിന്നീടായി ഇൻസുലിൻ റെസിസ്റ്റൻസിലേക്കും നയിക്കും.
അതുപോലെ, ഭക്ഷണം ഒഴിവാക്കുന്നവർക്ക് മധുരമുള്ള ഭക്ഷണങ്ങളോടുള്ള ആസക്തി കൂടുകയും, പിന്നീട് കൂടുതൽ അളവിൽ ഭക്ഷണം കഴിക്കാനും കാരണമാകുകയും ചെയ്യും.
ഇത് അമിതാഹാരം (overeating) എന്ന ദുഷ്ശീലത്തിലേക്കും പഞ്ചസാര ലഹരിയിലേക്കും (sugar craving) നയിക്കാം.
പ്രഭാതഭക്ഷണം ‘തലച്ചോറിന്റെ ഇന്ധനം’ എന്നാണ് പറയുന്നത്. അത് ലഭിക്കാതെ വന്നാൽ ശ്രദ്ധ കുറയുക, തലവേദന, ക്ഷീണം, മടുപ്പ്, അകാരണമായ ദേഷ്യം തുടങ്ങിയവയും ഉണ്ടാകാം. ജോലിക്കാരനും വിദ്യാർത്ഥിക്കും ഇതിന്റെ ആഘാതം കൂടുതലായിരിക്കും.
ഉപാപചയപ്രവർത്തനം (metabolism) മന്ദഗതിയിലാകുന്നതിനാൽ ശരീരത്തിലെ കാലറികൾ എരിയാതെ ഡയറ്റിന്റെ ഫലവും നഷ്ടമാകും.
ഹൃദയാരോഗ്യത്തെയും ഇത് പ്രതികൂലമായി ബാധിക്കും. പ്രഭാതഭക്ഷണം ഒഴിവാക്കുന്നത് ഹൈപ്പർടെൻഷൻ, പ്രമേഹം, ഹൃദ്രോഗങ്ങൾ എന്നിവയ്ക്ക് സാധ്യത വർധിപ്പിക്കുന്നു. അതിനൊപ്പം, സമ്മർദം, ആശങ്ക, പ്രകോപനം, മൂഡ് സ്വിങ്സ് മുതലായ മാനസികാരോഗ്യ പ്രശ്നങ്ങളും രൂക്ഷമാകാം.
“ഭക്ഷണം ഒഴിവാക്കുക” എന്നതല്ല ഫിറ്റ്നസിലേക്കുള്ള വഴി, ശരിയായ സമയം, ശരിയായ അളവിൽ, ശരിയായ ഭക്ഷണം കഴിക്കുക എന്നതാണ് ആരോഗ്യത്തിന്റെയും സൗന്ദര്യത്തിന്റെയും രഹസ്യം.
ഡോ. ഇക്ബാൽ കെ.എം | 9447125215