സുൽത്താൻ ഖാബൂസ് യൂണിവേഴ്സിറ്റി മലബാർ എഡ്യൂസിറ്റിയുമായി സഹകരിച്ച് അക്കാദമിക വിനിമയം നടപ്പാക്കും: ഡോ ഹുസൈൻ മടവൂർ

മസ്കറ്റ്: ഒമാനിലെ സർകാർ മേഖലയിലെ ഉന്നത വിദ്യാഭ്യാസ സ്ഥാപനമായ സുൽത്താൻ ഖാബൂസ് യൂണിവേഴ്സിറ്റി കേരളത്തിലെ മലബാർ എജ്യൂസിറ്റിയുമായി സഹകരിച്ച് അക്കാദമിക വിനിമയ പദ്ധതികൾ നടപ്പാക്കുമെന്ന് മലബാർ എഡ്യൂസിറ്റി ചെയമാൻ ഡോ. ഹുസൈൻ മടവൂർ അറിയിച്ചു. സുൽത്താൻ ഖാബൂസ് യൂണിവേഴ്സിറ്റി ഡെപ്യൂട്ടി വൈസ് ചാൻസലർ പ്രൊഫസർ ഹുസൈൻ അലി അല്ഖരൂസി , സുൽത്താൻ ഖാബൂസ് ഹൈ സെൻറർ ഫോർ കൾച്ചർ ആൻ്റ് സയൻസ് ചെയർമാൻ പ്രൊഫ. ഹബീബ് ബിൻ മുഹമ്മദ് ആൽ റിയാമി തുടങ്ങിയവരുമായി ഡോ ഹുസൈൻ മടവൂർ യൂണിവേഴ്സിറ്റി ആസ്ഥാനത്ത് നടത്തിയ കൂടിക്കാഴ്ചയിലാണ് ഇക്കാര്യത്തിൽ ധാരണയായത്.

2025 / 2026 അദ്ധ്യയന വർഷത്തിൽ പദ്ധതി ആരംഭിക്കും. അറബി ഭാഷയിൽ ബിരുദം നേടിയ ഇന്ത്യൻ വിദ്യാർത്ഥികൾക്ക് ആധുനിക അറബി ഭാഷയിൽ സംസാരവും എഴുത്തും പരിശീലിപ്പിക്കുന്ന ഹ്രസ്വകാല കോഴ്സുകളിലേക്ക് പ്രവേശനം നൽകും. ആധുനിക അറബി ഭാഷ പരിജ്ഞാനമുള്ളവർക്ക് ആഗോള തലത്തിൽ വലിയ തൊഴിൽ സാധ്യതയാണുള്ളത്. ഇതിൻ്റെ തുടർച്ചയായി ഒമാൻ വിദ്യാർഥികൾക്ക് ഇംഗ്ലീഷ് , ഇന്ത്യൻ കൾച്ചർ വിഷയങ്ങളിൽ ഇന്ത്യൻ യൂണിവേഴ്സിറ്റികളിൽ പരിശീലനം നൽകാനും പദ്ധതിയുണ്ടെന്ന് ഹുസൈൻ മടവൂർ പറഞ്ഞു.