ഷാർജ അന്താരാഷ്ട്ര പുസ്തക മേളയിൽ ആവേശമായി മലയാളി സംഗമം

ഷാർജ: നാൽപ്പത്തി നാലാമത് അന്താരാഷ്ട്ര പുസ്തകോത്സവത്തോടനുബന്ധിച്ച്, കെ.എൻ.എം. പബ്ലിക്കേഷൻസിൻ്റെ ആഭിമുഖ്യത്തിൽ പ്രധാന ഹാളിൽ സംഘടിപ്പിച്ച ബഹുജന സംഗമം സമൂഹത്തിൻ്റെ വിവിധ തുറകളിലുള്ള നൂറുകണക്കിന് ആളുകളുടെ സാന്നിധ്യംകൊണ്ട് ശ്രദ്ധേയമായി.

പ്രമുഖ ഇസ്ലാമിക പണ്ഡിതനും കെ.എൻ.എം. ഉപാധ്യക്ഷനുമായ ഡോ. ഹുസൈൻ മടവൂർ സമ്മിറ്റ് ഉദ്ഘാടനം ചെയ്തു. ലോകത്ത് സമാധാനവും സഹിഷ്ണുതയും പ്രചരിപ്പിക്കുന്നതിൽ ഷാർജ പുസ്തകമേള വലിയ പങ്ക് വഹിക്കുന്നുണ്ടെന്നും വിവിധ സംസ്കാരങ്ങളും വീക്ഷണങ്ങളും സമ്മേളിക്കുന്ന പുസ്തകമേള ഷാർജ ഭരണാധികാരിയുടെ ദീർഘവീക്ഷണത്തിൻ്റെ മകുടോദാഹരണമാണെന്നും അദ്ദേഹം അഭിപ്രായപ്പെട്ടു. വായിക്കുക എന്നാഹ്വാനം ചെയ്ത് കൊണ്ട് ആരംഭിച്ച വിശുദ്ധ ഖുർആൻ മനുഷ്യ രാശിയുടെ സർവതോന്മുഖമായ പുരോഗതിക്കും ആവശ്യമായ നിർദേശങ്ങൾ നൽകുന്നുണ്ട്. വംശീയ വിദ്വേഷവും വർഗീയതയും മനുഷ്യനെ നശിപ്പിക്കുമെന്നും അതിനാൽ ഏകമാനവതയുടെ സന്ദേശം പ്രചരിപ്പിക്കാൻ എല്ലാ വിഭാഗം ഞങ്ങളും ഒന്നിച്ച് പ്രവർത്തിക്കണമെന്നും അദ്ദേഹം ആവശ്യപ്പെട്ടു. ഷാർജാ ഭരണാധികാരി ഡോ സുൽത്താൻ മുഹമ്മദ് അൽഖാസിമിയുടെ സേവനങ്ങളെ അദ്ദേഹം പ്രശംസിക്കുകയും ഇന്ത്യൻ സമൂഹത്തിൻ്റെ നന്ദി അറിയിക്കുകയും ചെയ്തു.

സോഷ്യൽ മീഡിയ ഇൻഫ്ലുവൻസർ റിയാസ് ഹകീം മുഖ്യപ്രഭാഷകനായി. ബന്ധങ്ങൾ നിർമ്മിക്കപ്പെടുക എന്നതാണ് ആശയവിനിമയത്തിൻ്റെ ആത്യന്തിക ദൗത്യമെന്ന് അദ്ദേഹം അഭിപ്രായപ്പെട്ടു. തലമുറകൾ തമ്മിലുള്ള ആശയവിനിമയത്തിലെ വിടവ് നികത്തുകയാണ് രക്ഷാകർതൃത്വത്തിലെ പ്രധാന കടമ്പയെന്നും പ്രായോഗികവും തിരിച്ചറിവ് നൽകുന്നതായ ആശയ വിനിമയമാണ് ബന്ധങ്ങൾ നിലനിർത്താൻ ഉപകരിക്കുക എന്നും അദ്ദേഹം തുടർന്നു.

ടീനേജ് വിദ്യാർത്ഥികളുടെ ആവേശമായ ഫാത്തിമ മിൻഹ തുടർന്ന് സദസ്സുമായി സംവദിച്ചു. മക്കളുടെ ജീവിതത്തെ വിലമതിക്കണമെന്നും അവരുടെ അതിരുകൾ എന്തൊക്കെയെന്ന് കാര്യകാരണസഹിതം അവർക്ക് ബോധ്യപ്പെടുത്തണമെന്നും അവരെ അളവറ്റ് സ്നേഹിക്കണമെന്നും, തൻ്റെ മാതാപിതാക്കളിൽനിന്ന് ലഭിച്ച ഹൃദയസ്പൃക്കായ അനുഭവങ്ങൾ പങ്കുവെച്ച് കൊണ്ട് അവർ വിശദീകരിച്ചു.

പ്രഭാഷകർക്കുള്ള ഉപഹാരം യു.എ.ഇ. ഇസ്ലാഹി സെൻ്റർ പ്രസിഡണ്ട് എ.പി. അബ്ദുസ്സമദ്, ജനറൽ സിക്രട്ടറി പി.എ. ഹുസൈൻ ഫുജൈറ എന്നിവർ നൽകി. ചടങ്ങിൽ കെ.എൻ.എം. ബുക്സ് പ്രസിദ്ധീകരിക്കുന്ന വിവിധ പുസ്തകങ്ങളുടെ പ്രകാശനകർമ്മം നിർവ്വഹിക്കപ്പെട്ടു.

വി.കെ. സകരിയ്യ, എം.എം. അക്ബർ, അബ്ദുസ്സലാം മോങ്ങം, ഹുസൈൻ കക്കാട്, ആദിൽ അത്വീഫ് സ്വലാഹി, മുഹമ്മദ് അമീൻ, അബ്ദുൽ വാഹിദ് മയ്യേരി, കെ.എ. ജാഫർ സ്വാദിഖ്, എക്സൽ മുജീബ്, യാസർ അറഫാത്ത് തുടങ്ങിയവർ സംബന്ധിച്ചു. അത്വീഫു റഹ്മാൻ പരിപാടി നിയന്ത്രിച്ചു.

Abdul Nazeer P A
കൺവീനർ മീഡിയ,
ഇന്ത്യൻ ഇസ്‌ലാഹി സെന്റർ,
Tel: 0505772979, 0565208838