കൂട്ടമായി ആക്രമിക്കുന്ന സ്വഭാവമുള്ള കടന്നലുകൾക്ക് ഹോണെറ്റ് എന്ന് ഇംഗ്ലീഷിൽ പേരുണ്ടെന്നേ ഉള്ളു – പക്ഷെ അവർക്ക് തലയിൽ കൊമ്പില്ല

കൂട്ടമായി ആക്രമിക്കുന്ന സ്വഭാവമുള്ള കടന്നലുകൾക്ക് ഹോണെറ്റ് എന്ന് ഇംഗ്ലീഷിൽ പേരുണ്ടെന്നേ ഉള്ളു – പക്ഷെ അവർക്ക് തലയിൽ കൊമ്പില്ല. ശരീരത്തിൻ്റെ പിറകിൽ ഉള്ള വിഷമുള്ള് കൊണ്ടാണ് ഇവർ കുത്തി ആക്രമിക്കുന്നത്. അതു തന്നെ പെൺ പ്രാണികൾക്ക് മരത്തിലും മറ്റും കുത്തി അടർത്തിയോ തുരന്നോ വിടവുണ്ടാക്കി മുട്ട ഇടാൻ സ്ഥലം ഒരുക്കാനുള്ള ഓവി പൊസിറ്റർ എന്ന അവയവം പരിണമിച്ചതാണ്. സോഷ്യൽ വാസ്പുകളിലെ മുട്ടയിടാത്ത – പ്രജനന ശേഷി ഇല്ലാത്ത പെൺ കടന്നലുകൾക്ക് കൂടാക്രമിക്കുന്നവരെ ഓടിച്ച് വിടാനുള്ള സഹായ അവയവമായി അതു മാറി.തേനീച്ചകളുടേത് പോലെ ഒറ്റ കുത്തിൽ ആ മുള്ള് പറിഞ്ഞ് അറ്റ് പോവില്ല. അതിനാൽ പെൺ കടന്നലുകൾക്ക് എത്രയോ തവണ ഒരാളെ കുത്താനാവും.